amalinks wokungena

Abesifazana Bancediswa yiZimtrade Ukuthengisa Impahla Phandle Kwelizwe


Esinye sezicoco ezinikwe amankampani abesifazana aphumelelayo.

Inhlanganiso yezamabhizimusi eyeZimTrade isisungule uhlelo lokuhlomisa abesifazana abakubhizimusi ukuba baqale ukuthengisa impahla yabo phandle kwelizwe.

Lokhu kwenzelwa ukuthi ilizwe lithole imali yakwamanye amazwe njengoba libhekane lokusilela kwemali osekudonse phose iminyaka edlula amatshumi amabili.

Embukisweni wezokuthengiselana oweZimbabwe International Trade Fair (ZITF) osanda kwedlula, iZimTrade ibisekela amabhizimusi abesifazana adlula itshumi ukuba abukise impahla yabo kuHall 4.

Inkampani yabesifazana epheka insimbi ezindala iMawabeni Design ithole isicoco sokubikisa eZITF.

Obona ngokuqhutshwa kwenhlelo zakoBulawayo eZimTrade, uNkosikazi Jacquline Nyathi, uthi baphakathi kokuhlomisa amabhizimusi abesifazana ukuba baqale ukuthengisa impahla yabo ezilohlonzi kwamanye amazwe.

Inengi likwezokubaza impahla zendlini, ukupheka ezifela emlonyeni ezinje jamu, amanamunede kanye lokubaza impahla zendlini zokucecisa lezinye ezimbalwa.

Uthe kulamankampani akhokhelwa ngabesifazana asebelungele ukuyathengisa impahla yabo kwamanye amazwe njalo sebefundise iLupane Women Centre, iProweb lamanye amankampani aseBinga, eZvishabane ngezohlonzi lwempahla, lokusebenzisa ubulembu ekuthengiseni impahla yabo.

UDokotela Thokozile Chitepo, umqondisi weKozani Resources abalepulazi elilima izithelo eManicaland, uthi baqala libhizimusi ngoba babelobunzima bokuyathengisa izithelo zabo eHarare ezasezifika seziswabile.

Uthe iZimTrade yahamba epulazini labo lapho eyadinga khona abantu bokuhlomisa ekuthengiseni ijamu yabo emazweni asemhlubulweni weEurope.

UDokotela Chitepo uthi sebesebenzelana njalo leChinhoyi University logatsha lwezokulima olwabalimisi.

UMqondisi weMawabeni Designs, uNkosikazi Pams Goosen, okubhizimusi lokupheka insimbi ezindala, uthi usebumba izitsha lemiceciso yendlini.

Uthe uyajabula ngosizo aluthola eZimtrade ngoba usekwazi ukuthengisa impahla yakhe engela nkinga.

UNkosikazi Goosen uthole njalo isicoco ngesikhathi ebukisa engaphansi kweZimtrade, isicoco esivela kuConferderation of Zimbabwe Industries esombukiso omuhle ukudlula yonke kuHall 4.

Abesifazana abanengi eZimbabwe sebaqala ukusungula amabhizimusi kodwa imithetho yamabhizimusi lokuthengisa engahlelekanga ibabuyisela emuva kuthi lamabhanga awalamali yokuboleka etshiphileyo osekubangele ukuba abesifazana bagijimele kunhlanganiso yeZimtrade ukuba baphakanyiswe kwezamabhizimusi ngenhlelo abalazo.

Facebook Forum

XS
SM
MD
LG