Inhlanganiso ezimela uzulu ezehlukeneyo, ziyavumelana ngokubunjwa komthetho olawula indlela uhlangothi lwentathelizindaba lusebenza ngayo ukuze kuhambelane lokumunyethwe yisisekelo sombuso.
Emhlanganweni lentathelizindaba, owenzelwe e Jameson Hotel, wokubonisana phezu kwe Media Regulation Draft ngoLwesine abanengi baqonqosele ngokuqakatheka kwalumthetho.
Ukuswelakala kwalowomthetho bethi kuyingozi ekuthini, kuzokwenza uhlangothi lukahulumende lwe Zimbabwe Media Commission, oluvele lulamandla akusisekelo sombuso, luqhubeke lusenza umathanda.
Okugcizelelwe ngomunye wamalunga e board, enhlanganiso ye Voluntary Media Council of Zimbabwe (VMCZ), umnumzana Raphael Khumalo.
Wengeza uKhumalo ethi, kuyingozi enkulu, ukuswelakala kwalomthetho ngoba kungasoke kwenqabela uhlangothi lwe ZMC, ukubumba umthetho lusebenzisa amandla alo akusisekelo sombuso.
Kuvunyelenwe kulomhlangano ukuba njengoba i Media Regulation Draft Bill, isalungiswa ingakabi ngumthetho, kumqoka ukukungenisa konke okuqakathekileyo, okumele kulandelwe, ukulawula uhlangothi lokuthapha indaba elizweni, ukuzivala izikhexe ezingasetshenziswa nguhulumende, esebenzisa uhlangothi lwe ZMC.