Izakhamizi ze Harare, eMasvingo kanye lako Bulawayo zithi intengo yempuphu, itshukela lokunye okudliwa nsukuzonke kukhuphuke okwamagama ngoLwesithathu langoLwesine kusenziwa yikuthi izisebenzi zikahulumende zithenjiswe ukuphiwa amabhonasi lonyaka.
Izakhamizi lezi zithi umgodla wempuphu olesisindo samakilogram amahlanu-5kg okade ungamadola amabili lengxenye-$2.50 khathesi usuthengiswa ngamadollar amathathu lengxenye-$3.50 kuthi-ke isiqhuma sombhida ekade siyingxenye yedollar- 50 cents okwamanje sesiyi dollar.
I5kg yempuphu kwezinye izitolo eMasvingo le Harare ithengiswa ngamadollar amane-$4.00. Iintengo yetshukela layo ikhuphukile njengoba 1kg isiphose amadollar amabili-$1.90 kwezinye indawo amabili-$2.00.
Izakhamizi lezi zithi uhulumende kumele abeke imithetho eqondisa abamavinkili ukuthi bakhuphule njani intengo yempahla njengoba uzulu engasenelisi ukuthenga okudliwayo kwansuku zonke.
Isikhulumeli senhlanganiso ebona ngelungelo labathengi eye Consumer Council of Zimbabwe uNkosikazi Rosemary Mpofu uthi ukukhuphuka kwentengo yemphuphu kwenziwe yikuthi amabele asephela eziphaleni.
Isakhamuzi seMasvingo uMnu. Chris Ncube uthe ukukhuphulwa kwentengo yemphahla akubonakali ukuthi kubangelwa yini.
Isakhamuzi sako Bulawayo uMnu. Ndabezinhle Sengwayo uthi uzulu sesidla inqweqwe zomlomu ngenxa yokukhuphuka kwentengo yempuphu lokunye ukudla kwansukuzonke.
