amalinks wokungena

Breaking News

Intengo Yenyama Iqonga Okwamagama Kwele Zimbabwe


Izakhamizi zako Bulawayo, eHarare, Victoria Falls le Gwanda zithi intengo yenyama isiqonge okwamagama emavinkilini lemabutsha loba nje zingakwazi ukuthi lokhu kubangelwa yini.

Izakhamizi lezi zithi intengo yenyama edliwa ngabanengi iqonge isuka kumadola edlula amathathu- $3.60 ku kilogram yaya kwaphakathi kwayisikhombisa-$7 lathoba munwe munye-$9 ku kilogram. Kuthi-ke intengo yenyama ethandwa ngabalemali eye fillet iqonge isuka kwayisikombisa -$7 yaya kwalitshumi lambili-$12.

Inengi lalabo abakhulume le Studio 7 bathi kabasenelisi okwamanje ukuthenga inyama.

Bakhala njalo ngokuthi okwenza impilo ibe nzima yikuthi lentengo yembhida yokwengezelela isitshebo ikhuphukile kusukela ngolweSibili.

Unkosazana Linda Mpofu ohlala lengane zakhe uthi abantwana sebezatsheba ngamanzi ngenxa yokukhuphuka kwentengo yenyama. Unkosazana Mpofu uthi: "Ingane sezizakudla ingqweqwe zomlomo."

Umnu. Patrick Dube ongomunye wabalimi abagcina inkomo zokuthengisa uthi ukudula kwenyama kwenziwa yikuthi akusela nkomo zenyama kwele Zimbabwe.

"Okuzwisa ubuhlungu yikuthi okwamanje abalimi abanengi sebethengisa inkomo zokuthuthukisa izibaya eziyizo esezibulawa inyama ithengiselwe uzulu."

XS
SM
MD
LG