Seliphindele njalo esiqongweni sengalane yemiklomelo iqembu le Highlanders ngemva kwemidlalo yesigaba se Castle Premier Soccer League edlalwe ngempelaviki edluleyo.
Iqembu le Highlanders linqobe ele Caps United nge 1 ka nya okuyimpumela elitshiye lilemiklomelo engamatshumi amathathu ngemva kwemidlalo elitshumi lane.
Kundawo yesibili kuhlezi iqembu le FC Platinum lona elinqobe ele Bulawayo City nge 1 ka nya njalo lalo lilemiklomelo engamatshumi amathathu kodwa lingaphansi kwe Highlanders ngoba lihlohle amagoli amalutshwane.
Iqembu le Caps United okuyilo ebelihlezi phezulu phambilini kwemidlalo yangempelaviki lihlezi kundawo yesithathu lelimiklomelo engamatshumi amabili lathoba munwe munye.
Kundawo yesine kuhlezi iqembu le Dynamos lona elilemiklomelo engamatshumi amabili lanhlanu njalo elibe ngutshiki lobhanqa 0-0 leqembu le ZPC Kariba lona elisendaweni yesihlanu lilemiklomelo engamatshumi amabili lantathu.
Iqembu le Triangle lihlezi kundawo yesithupha lilemiklomelo engamatshumi amabili lambili njalo linqotshwe nge 3 ka 1 liqembu le Ngezi Platinum elihlezi kundawo yesikhombisa lilemiklomelo engamatshumi amabili lanye.
Kundawo yethoba minwe mbili kutholakala iqembu le Harare City lona elibe ngutshiki lobhanqa 1 ka 1 leqembu le Chicken Inn njalo lilemiklomelo engamatshumi amabili.
Iqembu le Bulawayo City lihlezi kundawo yethoba munwe munye lalo lilemiklomelo engamatshumi amabili.
Endaweni yetshumi engalaneni kutholakala iqembu le Chicken Inn elilemiklomelo elitshumi lathoba munwe munye kuthi ngaphansi kwalo endaweni yetshumi lanye kuleqembu le How Mine lalo elilemiklomelo elitshumi lathoba munwe munye njalo elinqobe ele Border Strikers nge 2 ka nya.
Kundawo yetshumi lambili kuhlezi iqembu le Chapungu lona elinqobe ele Mutare City nge 2 ka nya okuyimpumela elitshiye lilemiklomelo elitshumi lathoba minwe mbili.
Iqembu le Hwange lihlezi endaweni yetshumi lantathu lalo lilemiklomelo elitshumi lathoba minwe mbili njalo libhaxabulwe nge 3 ka nya liqembu le Tsholotsho lona elihlezi ngaphansi kwalo lilemiklomelo elitshumi lanye.
Ekhuluma lentatheli zemidlalo umqeqetshi weqembu le Tsholotsho uLizwe Sweswe uveze ithemba lokuba iqembu lakhe selizaqhubekela phambili linqoba ngemva kokudonsa nzima ensukwini ezedluleyo.
Iqembu le Mutare City Rovers lihlezi kundawo yesibili nxa usuka ngaphansi kwengalane lilemiklomelo elitshumi ikanti ikhuba liyala lilokhu litshona kuqembu le Border Strikers lona elijeke amanye emsileni wengalane lilemiklomelo eyisithupha.
Amaqembu amanengi asedlale imidlalo elitshumi lanhlanu okutsho ukuba isizini yalonyaka isifike phakathi laphakathi kodwa kulamaqembu ambalwa okumele adlale imidlalo eyadluliselwa phambili.
Lawo ngabalisa ele Highlanders elizadlala lele Triangle, ele Chicken Inn elizadlala lele FC Platinum kanye lele Tsholotsho elizadlala lele Mutare City Rovers.
