Abalandeli beqembu lomdlalo wenguqu ele Highlanders bathi iqembu leli yilo elizaphakamisa inkezo ye Chibuku Super Cup ngemva kokwethulwa koluhlu lokuba azadlala njani amaqembula esigabeni sama quarter-finals.
Iqembu le Highlanders lixegwe leqembu le How Mine kusigaba sama quarter-final kumncintiswano walonyaka owe Chibuku Super Cup kodwa umlandeli weqembu le Bosso owaziwa ngegama elithi TK uthi ubefuna bahle baditshaniswe leqembu le FC Platinum okuliqembu abancintisana lalo ukuphakamisa isicoco seligi.
“Thina sifuna kubemnandi yikho bengikhangelele ukuba bahle basiphe iqembu le FC Platinum kodwa kungasenani sizadlala layo iHow Mine loba nje sizayidla.”
Omunye njalo umlandeli weqembu le Highlanders uElijah uthi yena uhlelo lwe quarter – final luhle ngoba lupha iqembu le Bosso ithuba elihle elokudlulela kusigaba esilandelayo esomncintiswano.
“Idraw leyi inhle kakhulu ngoba silethuba lokudlulela kusigaba sama semi-final. Loba iqembu le How Mine lidinga ukuphindisela ukudliwa kumidlalo yeligi abangeke basenze lutho ngoba sileqembu eliqine kakhulu.”
Umqeqetshi oke wasebenza lamaqembu abalisa ele Railstars, ele Chicken Inn, ele Bantu Rovers kanye lele Highlanders, uMandla Mpofu, uthi indlela okuhlelwe ngayo kusigaba se quarter-final sokungenzeka ukuba iqembu le Highlanders lihlangane lele FC Platinum ku final yenkezo ye Chibuku.
“Umbono wami ngibona angani kuzakuba mnandi njengoba zindala zombili kuligi ikanti ngemva kwe draw yayizolo sesicabangela ukuba iPlatinum le Highlanders zingahlangana ku final ikanti zivele zisazihlangana kuligi imidlalo isisiyafika emaphethelweni.”
Intathelizindaba esebenzela edolobheni lako Bulawayo uJoel Tsvakwa uthi amaqembu amancane angamangalisa abantu ngokwenza kuhle kumncintiswano we Chibuku Super Cup.
“Amaqembu amancane ajwayele ukudlala kuhle kumcintiswano yenkezo kungakhathalekile ukuba adlala njani kuligi yikho amaqembu amakhulu akumelanga adelele.”
Omunye njalo umsekeli weqembu le Highlanders uStanford Ndlovu wamukele ukuxegwa kweqembu lakhe lele How Mine esithi lumdlalo uzakuba mnandi okwamagama.
“Idraw ye Chibuku imnandi kakhulu ngoba iHow Mine liqembu elidlala kuhle kakhulu okuzakwenza lathi sidlale siqinile. Loba kunjalo kodwa lonyaka inkezo iyabuya koBulawayo.”
Imidlalo yesigaba se quarter-final eyenkezo ye Chibuku Super Cup izadlalwa ngempelaviki ezayo njalo amaqembu azadlala ngokulandelayo; NgoMgqibelo iqembu le Ngezi Platinum lizemukela ele Tsholotsho enkundleni ye Baobab kuthi iqembu le ZPC Kariba lizadibana leqembu le Harare City enkundleni ye Nyamhunga.
NgeSonto iqembu Triangle lizadlala lele FC Platinum ngase Gibbo kuthi iqembu le How Mine lizangqikilana leqembu le Highlanders eBarbourfields.
