amalinks wokungena

IMighty Warriors Siyaqalisa Imidlalo yeAfrica Women Cup of Nations

  • Joseph Njanji

Iqembu leMighty Warriors selihambile eCameroon.

Iqembu labesifazane elimela ilizwe emdlalweni wenguqu liphakame ngoLwesithathu lilubhekise kwele Cameroon lapho eliyephatheka khona kumncintiswano we Africa Women Cup of Nations wona okhangelelwe ukuqala ngoMgqibelo.

Amalungiselelo eqembu le Mighty Warriors phambilini kokuyaphatheka kwalo kumidlalo yezwekazi lase Africa eye Africa Women Cup of Nations awaqhutshwanga ngemfanelo njengoba eqale sekusele amaviki amabili ukuba limidlalo eqoqwa lilizwe le Cameroon iqale.

Loba kunjalo umsekeli kamqeqetshi weqembu le Mighty Warriors uSithethelelwe “Kwinji” Sibanda uthi bazimisele ukwenza kuhle kulimidlalo eyokudinga intshantshu zezwekazi lase Africa.

“Eqinisweni sibili asilungiselelanga ngendlela kodwa asikholelwa ekwehlulekeni yikho kusonaleso sikhathi esincane esisitholileyo ukuba senze amalungiselelo sizamile ukwenza izinto eziqakathekileyo ezingasenza sibe lempumela enhle emidlalweni yethu.”

Iqembu le Mighty Warriors likusibaya sika Group A ndawonye leqembu le Cameroon, ele Egypt kanye lele Banyana Banyana elase South Africa.

Iqembu le Zimbabwe lele South Africa yiwo abemele izwekazi lase Africa kumncintiswano we Olympics oqhutshelwe elizweni le Brazil ngenyanga kaNcwabakazi njalo Nkosazana Sibanda uthi yena lokhu kulakho ukubaphathisa loba kubalathele inking.

“Ngingathi kumbaxambili ngoba sivele siyakubona ukuba abantu bayabe bekhangelele ukuthi sidlale kuhle kodwa kulakho njalo ukupha intshukuntshu abadlali bethu ukuthi badlale ngendlela ekhomba ukuba bona bavela dlala kuma Olympics.”

Kusibaya sika Group B kulamaqembu abalisa ele Nigeria, ele Mali, ele Ghana kanye lele Kenya.

Amaqembu azaphutsha esendaweni ezimbili eziphezu kwengalane kuzibaya zombili yiwo azadlulela kusigaba se semi-final.

Ekhuluma phezu kwamathuba eqembu lama Mighty Warriors kulumncintiswano we Africa Women Cup of Nations uNkosazana Sibanda uthe bazazama ngamandla abo wonke ukuba bengayangisi.

“Njengenjayelo thina nxa sisiyadlala siyabe sithembisa ukuba siyemela ilizwe lethu kuhle sidlale ngendlela ezasenza siphumelele.”

Iqembu le Cameroon lele Egypt yiwo azakuba ngabaqali besiziba ngoMgqibelo sekunganxeme ihola lesithathu emini kuthi iqembu le South Africa lele Zimbabwe azangqikilana sekuganxeme ihola lesithupha ntambama.

NgeSonto iqembu le Nigeria lizadlala lele Mali ngehola lesine emini kuthi ele Ghana lizangqikilana lele Kenya ngehola lesikhombisa ntambama.

XS
SM
MD
LG