amalinks wokungena

Breaking News

Dr. Parirenyatwa: UZulu Kelatshwa Ngemfanelo Esigodini Hospital


Izakhamizi labongi Esigodini bathi balethemba lokuthi ukwethekela kukamphathintambo wezempilakahle kuzaletha inguquko kulesisibhedlela esingenelisi ukufeza indingeko zabantu lokhe saqalisa ukubizwa ngokuthi yisibhedlela esikhulu sesiqinti seUmzingwane.

UDr. David Parirenyatwa wethekelele lesisibhedlela kumaviki amabili adluleyo lapho aveze khona ukukhathazeka ngesimo sokuswelakala kwemitshina, imithi, izindlu zokuhlala kanye labongi abaneleyo.

Uthe kwakungamelanga lesisibhedlela sithwaliswe umlandu wokunakekela isigaba sonke sona singaphathiswanga ngendingeko ezikhona.

Uthe silokhe siyikilinika nje eyanikwa ibizo lokuba yisibhedlela esikhulu.

Umongikazi kulesisibhedlela, uNkosazana Rita Mahlangu, uncome umphathintambo ngenyathelo lakhe lokwethekela ethi ulethemba lokhu kuzenza bathole usizo olufaneleyo ukuthi basebenze.

Uthe bangabe besaziwa njengesibhedlela sesigaba kodwa abenelisi ukusiza izigulane eziza zivela kwezinye indawo kulumango ngoba labo besesimeni esifanayo sokuswela imithi, imitshina labodokotela.

UMnumzana Mekiya Tshuma, isakhamuzi salindawo, uthe izibhedlela zemaphandleni zidinga ukuphathiswa ngoba ezinengi sezaba yizakhiwo nje ezingelalutho lokuphathisa izigulane.

Esinye njalo isakhamuzi, uMnumzana Phathisani Dube, oweUmzingwane, uthe bahamba amakhilomitha phose angamatshumi amabili ukuyafinyelela isibhedlela lesi.

Uthe kade bakhalaza ukuthi benzelwe ikiliniki eduzane kodwa izikhalazo zabo ziphelela emoyeni osokuthwalise nzima abesifazana ababelethayo kanye lensane ezidinga ukuhlatshwa njalonje.

UDr. Parirenyatwa ubeyethekelele isibhedlela lesi kanye lese Filabusi ekhangela indlela ezisebenza ngayo, engamsuthisanga.

Ukhale kakhulu ngokusilela kwemali evela kuhulumende yokuphathisa ukuqhutshwa kwenhlelo.

Umongameli Robert Mugabe wathembisa izakhamizi zakulindawo ukuthi zizathola ikiliniki entsha esikolo se Mzingwane kuthi isibhedlela se Esigodini siphathiswe ukuguquka senelise ukukhangela isigaba sonke.

Lesi sithembiso wasenza phose iminyaka elitshumi eyadlulayo lapho ibandla lakhe laphatha umhlangano walo omkhulu kulesisigaba kodwa izakhamizi labongi balokhu besabambe elikantulo.

XS
SM
MD
LG