amalinks wokungena

Isizalwane seZimbabwe Satshaywa Ngemvubu eBotswana Sahle Sawoma Umhlubulo

  • Martin Ngwenya

Isizalwane seZimbabwe, esesiphanyeke emthethwandaba udaba lokuhlukuluzwa ngamapholisa eBotswana okwasitshiya sisehluleka ukuhamba, sithi impilo isinzima ngemva kokuba uhulumende walelolizwe emxotshe endlini abehlala kuyo enkambeni yamapholisa.

UMnu. Kgotso Nyathi, oleminyaka engamatshumi amabili lambili yokuzalwa, umiswe phambi komthethwandaba nyakenye, wagwetshwa ngemva kokutholakala elecala lokweba kanye labanye ababili abeZimbabwe.

Wagwetshelwa ukuyathelwa imvubu kane emhlane njalo lokuthi avalelwe umnyaka owodwa ejele.

Kodwa lamuhlanje uNyathi usegogekile esebenzisa isihlalo esilamavili- iwheelchair- kulandela isehlakalo sokuthelwa imvubu leso.

Utshele IStudio 7 ukuthi wazithola esewome omunye umhlubulo etshaywe yistroke ngemva kokuthelwa imvubu. Kwaba yikuqala kwendubo zakhe.

“Umpholisa wangitshaya kane esebenzisa intambo kagetsi. Ngathi ngibatshela ukuthi ngiyagula, abakutshayanga ndiva, kodwa ngacina ngigijinyiselwa esibhedlela. Ngahle ngawoma umhlubulo, ngayaqala ukupika ejele ngingela wheelchair ezinye izibotshwa zacina zikhala ngokuthi ngiphiwe sona isihlalo esilamavili.”

Uthi ngemva kokuphuma kodaba lwakhe kumaphephanda olokuthi uhambisa uhulumende weBotswana emthethwandaba edinga ukuhlawulwa izigidi ezine lengxenye zamaPula (P4.5million), amapholisa amxotsha lapho okade engcinwe khona kweyinye inkamba eTlokweng, duze lesigodlo iGaborone.

Abogatsha olubona ngokungena lokuphuma kwabantu eZimbabwe, olwe immigration, lwayala ukwamukela uNyathi ekusimo akiso besithi uhulumende weBotswana kabone ukuthi uyelatshwa kuqala.

UNyathi uthi khathesi kayenelisi ukwenza noma yini njengoba esegeziswa njalo ephakanyiswa uma efuna ukuya esambuzini.

“Ngike ngachitha umthambiso ngisebenzisa ithumbu lokuhlonywa ngisejele. Okwakhathesi angiyenelisi lutho ngiyaphakanyiswa. Engikwenelisayo yikuzidlisa kuphela.”

Khathesi ungcinwe ngomunye uMsamariya olozwelo, esigabeni seOodi, ngaphandle nje kweGaborone.

Akuka bekwa ilanga lokungena kodaba luka Nyathi emthethwandaba, kodwa amapholisa wona avika ngokuthi ukuthela imvubu yisijeziso esisemthethweni eBotswana ngakho akula mthetho abawephulayo.

Facebook Forum

XS
SM
MD
LG