amalinks wokungena

Izakhamizi ZakoBulawao Zithi Kaziwafuni Ama Bond Notes


uZulu utshele amalunga edale lephalamende ukuthi kabawafuni ama bond notes.

uZulu utshele amalunga edale lephalamende ukuthi kabawafuni ama bond notes.

Izakhamizi zedolobho lakoBulawayo zithi kaziyifuni imali yohlobo lwama bond notes eqalise ukusetshenziswa ngoMvulo.

Zethule lokhu ngoLwesine emhlanganweni oqoqwe yikhomithi yedale lephalamende ebuthelela imbono kazulu ngomthetho olungiswayo ozakwenza ukuthi ama bond notes la asebenze okusemthethweni.

Ezinye izakhamizi zikhulume zifuthelene zisithi uhulumende kumele abazwele ngoba zalahlekelwa yimali enengi okumangalisayo kusasetshenziswa imali yeZimbabwe eyacina ukusebenza ngomnyaka ka2009 ngenxa yokugugudeka okumangalisayo.

Banengi abatshengiselayo ezitaladini besithi kabawafuni ama bond notes.

Banengi abatshengiselayo ezitaladini besithi kabawafuni ama bond notes.

Abantu bonke abanike umbono wabo ngohlobo lwemali le kade bezonde beganunwabo ngendlela eyenziwe libhanga lelizwe eleReserve Bank of Zimbabwe elethule uhlelo lwemali le lingakhulumisananga lozulu.

Batshele ikhomithi yedale lephalamende eyengcebo ukuba iyebikela idale lephalamende ukuthi abantu bakoBulawayo bathe kabayifuni imali le.

Bathi akulangitsho inkampani eyodwa esavulile edolobheni leli njalo kabafuni kubuyela esimeni sika2008 lapho abasebephila ngokudla ibarley benatha lamajolly juice.

Osakhulayo, uMnu. Millicent Nyathi, ubike ukuba bacelwa ukuhlonitshwa ngumongameli weZimbabwe njalo njengoba bengayifuni imali yama bond notes ngoba lapho abawoda khona impahla zabo zokuthengisa imali le bavele abalithathi njengoba kibo ifana lephepha lokusebenzisa esambuzini.

UNyathi igcizelele esithi badla nzima, baphila nzima njalo lemizamo kahulumende yokuvuselela amankampani anjenge Merlin uhulumende uyayincindezela.

UMnumzana Patrick Ndlovu laye ungezelele esithi ama bond notes kawafuni njalo amalunga edale lephalamende kumele bahambise ilizwi likaBulawayo lokuthi ibond alifunakali.

UNdlovu uchaze ukuthi amalunga edale lephalamende azehlisile njalo kumele bahloniphe uzulu. Uthe ulisizi kwabasakhulayo abangaze bahole kodwa bakhalela imali yohlobo lwama bond notes.

Esinye njalo isakhamuzi sakoBulawayo, uMnu. Ndodana Msipa, ubike ukuba amalunga edale lephalamende bangamasela njengoba abanye babo bakhanya besekela uhlelo lolu lweRBZ olucuphula uzulu.

UMnu. Iphithule Maphosa, oyisikhulumeli sebandla le Zapu, uthe akukhanyi kahle ukuthi imali le izasetshenziswa njani eZimbabwe.

Akukhulumileyo kusekelwe yizakhamizi ezinengi zakoBulawayo ezithe azisoze ziyibambe imali le ebiswe ngendlela engalunganga.

XS
SM
MD
LG