Inhlanganiso yezakhamizi zedolobho le Gwanda iyathandabuza ukuba iqhubekele phambili itshengisela isola udubo lokusilela kwamanzi kulelidolobho ngoLwesihlanu kumbe ilalele ampholisa athi bame ngoba umka Mongameli, uNkosikazi Grace Mugabe, uzabe esethekelela lelidolobho ngalelolanga.
Inhlanganiso ye Gwanda Residents’ Association (GRA) eqoqa lokhu kutshengisela ithi ngokwesibili amapholisa ebalisa ukutshengisela.
Ngeviki edluleyo amapholisa athi awaphiwanga isicelo sokutshengisela kusalamalanga ayisikhombisa usuku lokutshengisela lungakafiki njengalokho okufunwa ngumthetho.
Okhokhela amapholisa kulesi sigaba, uSuperintendent Stephen Mutema uthumele inhlanganiso yeGRA incwadi esithi amapholisa kawasoze enelise ukulondoloza ukuthula ngoLwesihlanu ngoba kuzakuba kulemicimbi eminengi ngalelolanga.
"Sifuna ukulazisa ukuthi alingeke latshengisela ngoLwesihlanu ngoba kuzakuba kulemicimbi embalwa ebalisa owe International Women’s Day, iFamilies Day lokwethulwa kwenhlanganiso yabembi besifazane eye Women in Mining," kutsho uMatema.
Unobhala we GRA, uMnu. Maduma Fuzwayo, utshele iStudio 7 ukuthi kkathesi sebetshelwe ukuthi bangatshengiseli njalo ngoba uNkosikazi Mugabe ukhangelelwe ukuthi uzafika kulelidolobho ngoLwesihlanu.
Fuzwayo uthe, "Kodwa sicele ukuba nxa kusenzakala engafika uNkosikazi Mugabe sizamnika izikhalazo zethu esibona ukuthi kazazi."
