amalinks wokungena

IZapu Ingena Kumanyano weCoalition of Democrats

  • Mavis Gama

UMnu. Dumiso Dabengwa (ophakathi kwababili laba) webandla leZapu ungenisa ibandla lakhe kumanyano weCoaliation of Democrats.

Amapholisa achithe umhlangano wokwamukela ibandla le Zapu kumanyano wamabandla owe Coalition of Democrates (CODE ).

Iziphathamandla zewotela le New Ambassador e Harare zibize amapholisa lanxa lumanyano ubusuhlawule imali yokwenza lumhlangano.

Inkokheli yomanyano we CODE isole kakhulu inyathelo elithethwe ngabaqondisi be Ambassador Hotel yathi lokhu ngeyinye yendlela abethuselwa ngayo libandla la Zanu PF elingafuni oliphikisayo ekuqhubeni inhlelo zikahulumende.

Umhlangano lo ucine usenzelwa emawofisini eTanganyika House awomkhokheli welinye lamabandla aphikisayo aphakathi komanyano lo elikhokhelwa nguMnumzana Elton Mangoma ele Renewal Democrats of Zimbabwe.

Umgcinisihlalo womanyano we CODE, umkhokheli welinye lamacele eMDC, uProffessor Welshman Ncube, uthe asibamangalisi isenzo samapholisa.

Lanxa kube njalo uProffessor Ncube uthe umhlangano lo wenziwe ngemfanelo.

Umkhokheli webandla leZapu, uDr. Dumiso Dabengwa, ulobe kusivumelwano seCODE ukuthi ibandla lakhe seliyingxenye yomanyano lo.

UDabengwa utshele intathelizindaba ukuba bebevele beyingxenye yalumanyano kusukela amabandla aphikisayo ewubumba nyakenye kodwa bebengakangeni ngokupheleleyo.

Abomanyano we CODE bathi bazimisele ukusebenza layiloba yiliphi ibandla lezombusazwe elikholwa kuzimiso zawo ngenjongo yokulwisana lobukhokheli bukamongameli Robert Mugabe lebandla lakhe ele Zanu PF.

Imizamo yokukhulumisana leziphathamandla zewotela ye New Ambassador yehlule.

Kazange azihluphe ukufuna ukusibona umqondisi wewotela le kodwa omunye wakhe uMnu. Moreblessing Mare lelizwi lokuba sikhulumisane lophethe uhlangothi olubona ngezokukhulumisana lozulu, kumawetela angaphansi kwe Rainbow Towers, uNkosikazi Pride Khumbula.

Belungaphendulwa ucingo luka Nkosikazi Khumbula kanya lomakhalekhukhwini wakhe.

XS
SM
MD
LG