Ingcwethi kwezomnotho zithi eleZimbabwe lilesikwelede samabillion edlula alitshumi lantathu $13,4 billion, zisithi ukungethembeki lokuvalwa kwamankampani sekwenze imali ebuthaniswa nguhulumende egoqela umthelo ohlawulwa nguzulu lamankampani yehla kakhulu.
Eyinye yalezingcwethi, uMnunzana Believer Mhlanga, utshele umhlangano oveza izikwelede zelizwe oqoqwe yinhlanganiso yeZimbabwe Coalition on Debt and Development, ukuthi isikwelede lesi sikhulu kakhulu njalo kulezinye ezisensitha uhulumende azifihlela zona uzulu.
Wengeza esithi ubugwelegwele labo yibo osebengeze isikwelede lesi. Uthe uzulu uyakwazi ukuthi abantu abathile bayaphatheka ekuqileni.
Obona ngenhlelo enhlanganisweni yeZIMCODD, uNkosikazi Noma Ncube, uthe uhlupho yikuthi uzulu nguye osebhadala umthelo kukanti-ke amankampani okumele ahlawule esewubalekela.
UMnunzana Nqobani Dube, olilunga leboard yeZIMCODD, ubike ukuba usizi yikuthi wonke umuntu ongakazalwa eZimbabwe uzathi ezalwa elesikwelede okuyinto elihlazo.
Umumo womnotho elizweni umi manzonzo njalo inengi labantu alisebenzi lamankampani amanengi avalwa osekubangele ubuyanga obukhulu ezweni kodwa kulehlekana labantu abaphatheka emisebenzini yokungethembeki eyecorruption abanothe okwedlulisa amalawulo.
