amalinks wokungena

Uzulu Uqhubekela Phambili Etshengisela Esigodlweni sikaTrump

  • Gibbs Dube

A protester in New York outside the Trump Tower.

Sokuqhamuke udlakela kwenzinye indawo zeMelika kuthi kwezinye uzulu utshengisela ngokuthula kulandela ukukhethwa kukaMnu. Donald Trump ukuba abe ngumongemeli omutsha welizwe leli.

Izizalwane zeMelika zitshengisele ezitaladini ngoLwesithathu ebusuku eNew York zikhonona ngokukhethwa kukaMnu. Donald Trump kukhetho lukamongameli ngoLwesibili. Lokhe ziqhubekela phambili ngalokhu endaweni ezinengi zelizwe.

Abatshengiselayo eNew York base sigodlweni samankampani kaTrump awe Trump Tower ese Manhattan. Abakhulume leStudio 7 bathe akucaci ukuthi uTrump uzabenzelani esengumongameli weMelika.

Kulokutshengisela okufanayo emadolobheni anjenge Chicago, Los Angeles, Philadelphia, Boston, Washington DC, Oregon le Minnesota. Kasenelisanga ukukhuluma ngodaba lolu labasebenza loTrump.

Abatshengiselayo bathi uTrump, ongqobe uNkosikazi Hillary Clinton ngoLwesibili, ukhanya engelabuntu obubalulekileyo.

A protester standing up for her beliefs ...

A protester standing up for her beliefs ...

UNkosazana Mercy O’Marley, okade etshengisela phandle kwesigodlo sika Trump eNew York, uthe akumelanga uTrump abengumongameli welizwe leMelika.

Omunye njalo obetshengisela phandle kwesigodlo lesi nguNkosazana Teo Rogers othe kumele uTrump ahloniphe ilungelo labesifazane.

Kodwa-ke esinye isizalwane seMelika esicele ukuthi simbize ngesibongo sakhe esako Howard okade esesitaladini esekela uTrump, uthe abatshengiselayo laba bachitha isikhathi sabo.

Uphinde wathi uTrump ulakho ukwethulela uzulu imisebenzi.

Akwaziwa ukuthi kuzaphetha ngani ukutshengisela lokhu endaweni ezinengi kweleMelika lapho inengi labantu akade likhangelele ukuthi uClinton uzanqoba kukhetho lolu. UTrump okwamanje uselungiselela ukungena esigodlweni sikamongameli weMelika ese White House loba ekhangelelwe ukuthi uzafungiswa okusemthethweni ngoZibandlela.

UTrump uhlangane loMongameli Barack Obama ngoLwesine eWashington DC lequla lakhe eselilungisela ukuthi angene eWhite House.

XS
SM
MD
LG