NgolweSibili umgwaqo uMugabe Way koBulawayo uvuke ubhalwe Devolution Way ngabasakhulayo abangaziwa ukuthi ngabaliphi ngobani.
Lokhu abanengi bathi kuveza ukuthukuthela kwabantu basemhlubulweni weMandebeleni ngombuso okhona elizweni abaphethwe njengabokuza bengananzwa yikho bekhalela ukuthi baziqondisele imvelo lenotho yabo phansi kombuso wezabelo okulilungelo labo elimunyethwe yisisekelo sombuso welizwe, oweDevolution.
Okungumnqondo ofuqwa ngamabandla afana laboZapu lamanye asebenzelana layo okuvezwe yikuba khona kwawo emhlanganweni wabo omkhulu oweCongress osungule koBulawayo namhlanje.
Kube labanye abathi vele bona abalandaba leDevolution asebekufuna yikuthi kube lelizwe likaMthwakazi okuyikho okuzalungisisa inkinga zabo.
Ukuhlaziya loludaba uPraxedes Jeremiah oweStudio 7 uxoxe labalwela ilungelo labantu bakulumhlubulo, abathi uMnu. Collins Mlalazi oseBotswana eloMnu. Mbuso Fuzwayo wakoBulawayo.
Umqalisiziba kunguMlalazi othi akaboni iZapu iqhubekisela phambili injongo yabo.
"Ngibona sekuluthuli kuphela. Abantu sebelandela kuphela ukuthi kudlule imota laphana. Ngangiluthanda ibandal leZapu kodwa lokhu esingkubona kathesi asiko Zapu," kutsho uMlalazi.
UFuzwayo uthi udaba lwe devolution alukhulunywa kakhulu yikho lungaqakathekiswa.
"Abantu bona bafuna ukuthi babambe okungokwabo ngoba elizweni leli bazithola beyizethekeleli," kutsho uFuzwayo.
