Sokubunjwe elinye njalo ibandla lezombusazwe eliphiksisayo, elizibiza ngokuthi Zimbabwe National Redemption Congress, elilenkokheli engavumelani lombono womanyano wamabandla aphikisayo kanye lomcabango othi kubunjwe iqula labantu abangelani lezombusazwe abamsulwa elingaphatha intambo zombuso andubana kwenziwe ukhetho eleNational Transitional Authority.
Abe ZNRC bathi kabavumelani lokusetshenziswa kwendlela zokutshengisela, ngoba kuphetha sekulodlakela, bekhankasela ukuba uzulu asebenzise indlela ezikusisekelo sombuso, ukukhetha inkokheli ngendlela yevoti.
Emkhosini wokuliphawula okusemthethweni, owenzelwe eMedia Centre, umkhokheli walo, umnumzana Knox Gwenzi Chivero Mutimusakwa, oyisisazalwane seMhondoro utshele intathelizindaba ukuba bona bayavumelana ukuba uhulumende we Zanu Pf okhona engasuswa kuphela esikhundleni ngokhetho, kulandelwa isisekelo sombuso, ezinye lezi zingasebenzi.
Omunye walamalunga, umnumzana Patrick Sigauke, uthi ufuna uzulu azwisise ukuba,ibandla lakhe,lehluke kakhulu kwamanye aphikisayo kungakho kumele alisekele ngoba lizoletha inguquko eswelakalayo.
USigauke uthi yena labanye bakhe, abesabi izehlakalo zohlukuluzwa loba ukubotshwa, njengalokho okwenziwa ngabamanye amabandla aphikisayo loba uzulu ophakamisa umbono owehluke kowenkokheli ebusayo.
Inkokheli ye ZNRC ithi uzulu usekhathele ngabamabandla akhona afana le MDC – T oZanu PF lamanye adlelezela abantu kungela okubonakalayo akwenzela uzulu.
Abebandla leli bathi selungile ukuncintisa kukhetho luka 2018 njalo khona bezangena kuzulu ukubeka inkokheli, ezibangeni ezehlukeneyo.
