Amapholisa eBotswana asedubule alimaza owesifazane oweZimbabwe ongene kulelolizwe okungekho emthethweni ngesikhathi esithi uyabalekela.
Lesi yisehlakalo sesibili phakathi kwenyanga ezimbili ezedluleyo osekutshiye abanengi bebambe owangaphansi.
Isizalwane seZimbabwe lesi, esingaqanjwanga ngegama, sisesibhedlela seNyagabgwe eFrancistown.
Amapholisa kafisanga ukukhipha okunengi ngodaba lolu ukuthi kwenzakalani ngelanga lokudutshulwa kwesizalwane lesi esasilingane wesilisa.
Owesifazane lo ubikwa ukuthi wadutshwala ngesikhathi amapholisa edinga abangena eBotswana okungekho emthethweni.
Isikhulumi samapholisa uMnu. Witness Bosija walile ukukhuluma ngaloludaba esithi basacwayisisa ukuthi kwahamba njani oweZimbabwe aze adutshulwe.
Owesilisa owaye lomama owadutshulwayo ugcinwe emapholiseni. Unakanelwa ukuthi wangena eBotswana okungekho emthethweni.
Kodwa abeZimbabwe abafana loNkosazana Mercy Khumalo bathukuthele ngesenzo sokuqhubeka kudutshulwa ikakhulu abantu abangahlomanga umlandu wabo kuyikungena eBotswana okungekho emthethweni.
"Lokhu kuthelela ulaka, yisikhathi sokuthi kukhulunywe ngodaba lolu."
UMnu. Jabu Ndiweni laye kazwisisi izehlakalo lezi. Uqhubeke esithi ilizwe leBotswana sokumele liyekele isenzo zalo lezi ezikhahlameza abantu bokuza, ikakhulu abavela eZimbabwe.
"… Ngokwesibili lokhu kusenzakala kodwa abantu beZimbabwe bayabe bengahlomanga, uyazibuza ukuthi umuntu umdubulelani uma kunjalo."
Abanye balombono wokuthi mhlawumbe eleBotswana, selidiniwe ngenengi eleZimbabwe elithululeka lizodinga imsebenzi, selizama ukufaka ukwesaba ngenjendlela yokwenqabela ukungena eBotswana okungekho emthethweni.