Abaphila ngokuthengisa abangamatshumi amane lanhlanu ngoLwesibili balahlelekelwe yimpahla ebiza inkulungwane lenkulungwane zamadollar ngemva kokulumathiswa ngomlilo lapho abayigcine khona.
Bacabangela ukuba le yimizamo yabezombusazwe abafuna ukubethusela ukuthi basuke kuleyo ndawo.
Kade bethithibele abathengisela lapho okuhlangana khona imigwaqo uChinhoyi lo Kwame Nkuruma, edolobheni leHarare.
Owaqhatshwa ukulinda leyompahla nxa abathengisayo besiya besiya emakhaya, wethuselwe ngowaziwa ngegama lokuthi nguMafa, olisotsha kuviyo le One Commando ngolweSine lweviki ephelileyo watshelwa ukuba uzonyamalala.
Ngemva kwalokho kwethuselwa, kulandele ukutshiswa limpahla, emadabukakusa.
Omunye wabalahlekelwe yimpahla kulesi sehlakalo, nguNkosikazi Bongani Zvikaita, ophila ngokuthengisa amatamatisi, ohlala emzini weEpworth.
Unkosikazi Zvikaita uthe sebephelelwe ngumphako ngoba yonke impahla yabo itshabalele ize itshiswe.
Ngomvulo ekuseni abaphila ngokuthengisa baxotshanise amapholisa kamanisipala akade esebenzelana labe Zimbabwe Republic Police (ZRP), befuna ukubathathela impahla yabo.
NgoLwesibili bekuyizimpi njalo, abacatshangelwa ukuba ngabasakhulayo bebandla elibusayo leZanu PF, behlukumeza uzulu edolobheni, bahlasela izitolo lezakhiwo ezithile.
Lezi ngezibalisa esikamsekeli kamongameli, uMnumzana Phelekezela Mphoko, ese Choppies kanye lo OK, otholakala lapho okuhlangana khona umgwaqo uKwame Nkuruma lo Leopold Takawira.
Abasakhulayo laba bayahlasele njalo emawofisini enhlanganiso emela abaphila ngokuthengisa, eye National Vendors’ Union of Zimbabwe (NAVUZ).
Umqondisi wenhlanganiso ye NAVUZ, uNkosikazi Value Mgagara, umangele ukuthi kungani behlasele amawofisi enhlanganiso abathi ilwela amalungelo abaphila ngokuthengisa.
Okumangalise abantu njalo yikuba lamapholisa ake azulazula esigodlweni samawofisi ebandla eliphikisayo le MDC, elikhokhelwa nguMnumzana Morgan Tsvangirai, betshiya abasakhulayo laba besenza intando yabo.
