Abaphila ngokuthengisa bangene ezitaladini edolobheni lakoBulawayo benanza isikhathi sokulwisana lodlakela emulini emkhankasweni owe 16 Days of Activism Against Gender Based Violence.
Bakwenze lokho ngaphansi kwesihloko esithi: "From peace in the world to peace in the home - Make education accessible to women and girls".
Abenhlanganiso yeWomen In Leadership Development (WILD) bemanyene labenhlanganiso elwela amalungelo abathengisayo eyeBulawayo Vendors’ Trading Association baqoqe ukufola lokhu koBulawayo ngenjongo yokukhuthaza ukuba abesifazane bangahlukuluzwa njalo kuhlonitshwa amalungelo abo loba nje bethengisa impahla etshiyeneyo ezitaladini.
Obona ngokuqoqwa kwenhlelo eWILD, uNkosazana Silethemba Mathe, uthe ukufola lokhu kubeyindlela yokuzama ukuphungula ubudlwangudlwangu emulini.
Umphathintambo obona ngedolobho lakoBulawayo, uMnu. Jasmine Toffa, laye ophatheke ekufoleni lokhu uthe uhulumende encedisana lamalunga edale lephalamende kumele ebone ukuba kubunjwa imithetho ezanqabela ngempela ukuhlukunyezwa emakhaya.
UToffa uthe kumele ahloniphe lelungelo lalabo anathengisa ezitaladini ababhekane lezehlakalo ezimangalisayo.
UNkosikazi Sheron Chiwa, ophila ngokuthengisa, uthe uhulumende kumele aqakathekise ukubatholisa indawo ezihlanzekileyo zokusebenzela ukuze labo bakhanye ukuba ngabantu abalamalungelo.
Ngenjongo yinye, inhlanganiso elwela amalungelo oluntu ikakhulu awezempilakahle locansi iVoice of the Voiceless (VOVO) layo ibelomhlangano edolobheni lakoBulawayo eAcademy of Music ngaphansi kwendikimba ebulenjini ethi #BringBackActivism.
Ifuna ukuthi kwehliswe ukuxabana phakathi kwezimuli ikakhulu lokho okubhekane labantu makhaza ebulenjini be internet.
Ekhuluma ngemva komcimbi wokusungala ukukhankasela ukwehlukana lodlame, umqondisi wenhlelo eVOVO, uMiles Moyo, uthe injongo yabo ngeyokuba abesifazana bangahlukuluzwa.
UMoyo uthe bakhuthaza ukuthi abesifazane baye mangala emapholiseni nxa bekhahlamezwe ngabesilisa.
Uphinde wathi sokuyisikhathi sokuthi inhlanganiso ezehlukeneyo zibelenjongo yinye yokulwisana lobudlwangudlwangu emulini ngoba kumele babenyandanye ngelizwi elilodwa ukuze kubelempumela.
UNkosikazi Soneni Gwizi, ophila lobugoga njalo othole isicoco sokulwela amalungelo alabo abaphila lobugoga, ubike ukuba bona obabo ubudlwangudlwangu ababhekana labo behlukene lobabanye abantu.
Omele abasakhulayo, uNozipho Moyo, uthe ngempela abasakhulayo bayabhekana lobudlwangudlwangu njalo lomumo oselizweni wenza baphilenzima emakhaya.
Umqondisi weGirls R Us osebenzela emaphandleni eMaNdebeleni, uNkosikazi Amanda Nkosi, uthe abasakhulayo abangamantombazana babhekane lenkinga ezinengi emakhaya njalo sebecina bengena kubhizimusi lokuthengisa amacansi lapho abafika babelobunzima obuphezulu njalo bayadlwengulwa kakhulu.
UBulawayo njengamanye amadolobho laye umanyene ekunanzeni umkhankaso wokuvimba udlakela emulini owe16 Days of Activism Against Gender Based Violence esithi kakuhlalwe kukhunjulwa malanga wonke umnyaka uze uyephela hatshi ngalesi sikhathi kuphela.
IZimbabwe ngelinye lamazwe elibhekane lodubo lobudlwangudlwangu kubangelwa yindlala lomumo welizwe omi manzonzo osekwenza kubenzima ukuba abantu baphilisane ngokuthula.
