Umsekeli kamongameli welizwe, eZimbabwe, uNkosikazi Joice Mujuru uthi kulamalunga edale lephalamende atshontsha inhlanyelo lemvundiso ye fertilizer okwakumele iholiswe uzulu yinkampani ye Grain Marketing Board (GMB) lonyaka.
UNkosikazi Mujuru ubikwa ethi okwenziwa yiziphathamandla zikahulumende lezi kuyayangisa njengoba bezithatha inhlanyelo yomumbu lemvundiso ye ammonium nitrate ziyithengisele uzulu okwakumele ayithole kungelambadalo eGMB.
Uthi usemazisile uMongameli Robert Mugabe ngodaba lolu osoluxabanise abalandeli bebandla le Zanu-PF.
Unkosikazi Mujuru kazange aqambe amabizo eziphathamandla lezi.
Inhlanganiso ye Anti-Corruption Commission ibikwa isibophise izisebenzi ze GMB ezinhlanu koBulawayo kulandela ukutshontshwa kwenhlanyelo lemvundiso ye fertilizer loba nje uzulu ekhala ngokuthi kulabalandeli bebandla le Zanu-PF kanye lamalunga edale leCabinet abatshontshayo okuholiswa yi GMB.
Umnu. Seiso Moyo umsekelo womphathintambo wogatsha lukahulumende lwezokulima uthi abakatholi amabizo amalunga edale le cabinet okuthiwa abetshontsha inhlanyelo lokunye okutshiyeneyo eGMB.
