amalinks wokungena

Inhlanganiso elwela amalungelo oluntu kwezemacansini eyeSexual Rights Centre (SRC) ngoLwesihlanu ibambane lezibhedlela zeMpilo Central Hospital kunye leUnited Bulawayo Hospitals lezinye inhlanganiso ukutholisa abantu abaphila engozini yokubamba imikhuhlane yengulamakwa usizo lokwelatshwa kungela mbadalo lokubaphathisa ngenhlelo ezitshiyeneyo.

Lokhu kwenzelwe emawofisini enhlanganiso le koBulawayo benanza uhlelo lokumelana lokuhlukuluzwa kwabesilisa labesifazana olwe16 days against gender-based violence.

Isikhulumi seSRC enguye njalo umqoqi wenhlelo, uMojalifa Mukwele, uthi bayajabula ngokuba loluhlelo olukhangelane lalaba bantu abasengozini enkulu yokubamba lokuthelelwa imikhuhlane yengulamakwa.

Uthe ukusebenzelana lezibhedlela ezinkulu zikahulumende kujonge ukuba bazi ukuba bengaphatha njani abantu abasengozini ukuze izigulane zingadondi ukuya esibhedlela ngoba zisazi ukuba zizaphathwa kahle.

Izakhamizi zakoBulawayo ezigoqela uNkosazana Sibangani Phiri, ophila ngokuthengisa icansi, uthe uyajabula ngosizo abaluthole eSRC.

Ugcizelele esithi ngabe uhlelo lolu luhlala lusenziwa ngoba bathole ukwelatshwa mahala njalo bekhululekile kungela kubandlululwa ababhekana lakho uma bengaya ezibhedlela.

Inhlanganiso ezibalisa iPopulation Service International, odokotela beMpilo leUBH, SAFAIDS, iContact leOXFAM lazo zithi kuqakathekile ukuba abakulesi sigaba sempilo bananzwe uma ilizwe lijonge ukuba wonke umuntu ezweni aphile bengabandlululwa.

XS
SM
MD
LG