Inkokheli yenhlanganiso yabalwa impi yenkululeko esigabeni seMatabeleland South ibikwa isixotshe umgcinisihlalo wayo esigabeni lesi, umnumzana Obendingwa Mguni ongumsekeli kamphathintambo wendaba zasekhaya lomgciningcebo, umnu. Smart Tshuma kunye lonobhala wohlangothi lwendaba zabesifazane, uNkosikazi Otillia Sibanda.
Abathathu laba betheswa icala lokuya emhlanganweni obikwa wahlambaza umkamongameli welizwe, uNkosikazi Grace Mugabe.
Abazi okwenzakalayo bathi kulokufuthelana okukhulu enhlanganisweni le, kulandela ukuxotshwa kukamnumzana Chris Mutsvangwa ebandleni elibusayo eleZanu PF, obekhokhela linhlanganiso esetheswa icala lokungahloniphi kanye lokuthuka unkosikazi Mugabe. Bethi njalo lokhu yikuqhubeka kokulwisana kubangwa izikhundla ebandleni leZanu PF osokukhokhelele ekuxotshweni kweziphathamandla ezinengi kulelo bandla.