amalinks wokungena

Kwenziwa Umhlangano Wabosomabhizimisi eZITF2017


Umsekeli kamongameli welizwe leZimbabwe, uMnu. Emmerson Mnangagwa uvule okusemthethweni umhlangano wabosomabhizimusi eZITF2017.

Umhlangano wabosomabhizimusi walonyaka oweZITF 2017 Business Conference oqoqwe yiZimbabwe International Trade Fair uqhutshwe ngemfanelo ngoLwesithathu.

Umhlangano lo uvulwe okusemthethweni ngumsekeli kamongameli uMnu. Emmerson Mnangagwa othe uhulumende uphakathi kokuqinisa uhlelo lokulima olwe Command agriculture ukuze isivuno lokwenjiwayo kuthengiselwe kwamanye amazwe kuthuthukiswe umnotho welizwe.

UMnangagwa utshele osomabhizimusi ukuba uhulumende uphakathi kokuvuselela ezomnotho ngokulima izilimo lezifuyo ezehlukeneyo njalo usebeke eceleni imali eyenela ukuthenga isivuno somumbu kubalimi ethi kunje sebeqalile ukulima ingqoloyi phansi kohlelo lokulima olweCommand Agriculture.

Umqondisi wenhlanganiso yezamabhizimusi eyeConfederation of Zimbabwe Industries, uMnu Busisa Moyo, yena uthe besabela abantu abazakuyathenga umumbu eZambia leMalawi ngemali ephansi bazowuthengisa eZimbabwe ngentengo ephezulu.

Omunye njalo usomabhizimusi, uNkosikazi Shiella Sidambe, uthe kuyathembisa ukuthi ezomnotho zizakhuphuka uma konke okumele kwenziwe kungaqhutshwa kahle.

Umsekeli kasibalukhulu webhanga lesizwe, iRBZ, uDokotela Khuphukile Mlambo, uvumile ukuba ilizwe libhekane lokusilela kwemali wathi kabalali ngemizamo yokubona ukuba uzulu uyathola imali ebhanga njalo lendwendwe ezinde ziyehla.

EleZimbabwe liphakathi kokugalula kwezomnotho ngenxa yezizatho ezehlukeneyo ezigoqela ezombusazwe, ubugwelegwele becorruption lokunye okufanayo.

Uhulumende uyavuma ukuba uhlelo lokulima uzikhokhela olwe Command Agriculture lubelezigwenxa kodwa sebekulungisile njalo bakhangelele ukuqhuba kahle kuhlandla elilandelayo.

Umbukiso walonyaka weZITF 2017 ungena kulanga lesibili lokhe kulabanye abalokhe bengakaqali ukubukisa ngenxa yobunzima abahlangana labo ekungeniseni impahla yabo abafana labeSenegal.

Lokhu kulandela ukungazwani labohlangothi olubona ngokungena lokuhlawulisa impahla engena elizweni abeZimbabwe Revenue Authority kunhlawulo okumele bayikhiphe ukuze impahla abalayo ingene elizweni.

Facebook Forum

XS
SM
MD
LG