amalinks wokungena

Liphose Lakha Phansi Iqembu leTsholotsho FC

  • Joseph Njanji

Umqeqetshi weqembu lenguqu ele Tsholotsho FC

Umqeqetshi weqembu lenguqu ele Tsholotsho FC

Lisinde ngesikhala senalithi ekugunyulweni kusigaba se Castle Premier Soccer League iqembu le Tsholotsho, ngemva kokuba liqede likundawo yesithathu nxa usuka ngaphansi kwengalane, ekufikeni komlindi uyacina kwemidlalo yalonyaka ngempelaviki eyedluleyo.

Lokhu kwenzakala ngemva kokuba inhlanganiso ye Zifa leye PSL zicine zivumelane ukuba kugunyulwe amaqembu amabili kuphela ekupheleni kwemidlalo yalonyaka ngemva kokuba kuke kwaba lengxabangxoza phezu kwenani lamaqembu azaphuma lokungena kusigaba saphezulu.

Iqembu le Tsholotsho liqede lilingene ngemiklomelo leqembu le Mutare City Rovers lona eliphutshe likundawo yesibili nxa usuka ngaphansi kwengalane njalo eligunyulwe ndawonye lele Border Strikers.

Zombili iTsholotsho leqembu le Mutare City Rovers ziqede zilemiklomelo engamatshumi amabili lesithupha kodwa eleTsholotsho lisinde ngoba lihlohlwe kalutshwane.

Umqeqetshi weqembu le Tsholotsho uLizwe Sweswe uthi ngemva kweminyaka emibili eqeqetsha iqembu le Tsholotsho, eliphathisa ukuba liyale lilokhu lidlala kusigaba saphezulu, usedinga ithuba lokuqeqetsha amaqembu amakhulu.

“Njengomqeqetshi kuyadingakala ukuthi ungakhula udinge kweyinye indawo. Amaqembu anjengabo Tsholotsho ngamaqembu amancane kodwa ngolwazi esengilalo sekumele lami kengizame kwezinye indawo njalo nxa kungabakhona lapho engidangakala khona ngingahamba.”

UPatrick Mhari

UPatrick Mhari

Iqembu le Caps United yilo eliphakamise isicoco ekupheleni kwemidlalo yalonyaka kusigaba se PSL ngemva kokuba liphutshe lilemiklomelo engamatshumi ayisithupha lantathu kuthi ele FC Platinum liqede likundawo yesibili lilemiklomelo engamatshumi ayisithupha lanye.

Ukaputeni weqembu le FC Platinum uPetros Mhari uthi bazame ngamandla abo wonke kodwa kwehlula ukuba bephakamise isicoco.

Sidlale kuhle njengeqembu ukuze sifike lapho esiphelele khona njalo ngitshayela ihlombe iqembu le Caps United labo balwile ukuze baphakamise isicoco. Kuzamele senze kuhle lathi emnyakeni ozayo njengeqembu le FC Platinum njalo ngibonga abasekeli bethu ngendlela abasisekele ngayo.”

Kolunye udaba olumayelana lomdlalo wenguqu iqembu labesifazane elimela isizwe emdlalweni wenguqu liphelelwe ngumphako kumncintiswano we Africa Women Cup of Nations oqhutshelwa elizweni le Cameroon kulezinsuku ngemva kokuba linqotshwe emidlalweni emibili laba ngutshiki lobhanqa emdlalweni owodwa kusibaya sika Group A.

Iqembu le Mighty Warriors libe ngutshiki lobhanqa 0 – 0 leqembu le South Africa emdlalweni walo wakuqala, lanqotshwa nge 1 ka nya liqembu lase Egypt emdlalweni wesibili kwathi emdlalweni walo wesithathu litshaywe nge 2 ka nya ngele Cameroon.

Sikhangele umdlalo kakhilikithi: Iqembu elimela ilizwe emdlalweni kakhilikithi linqotshwe ngama wickets ayisithupha ngele Sri Lanka ku final eye Tri Nations Series ofike emaphethelweni ngeSonto edolobheni lako Bulawayo.

Iqembu le Zimbabwe yilo eliqale ukutshaya ibhola lathola ama runs alikhulu lamatshumi ayisithupha lilahlekelwe ngabadlali bonke.

Kuthe iqembu le Sri Lanka seliphendula libuthelele ama runs alikhulu lamatshumi ayisithupha alesithupha lilahlekelwe ngabadlali abane kuphela.

XS
SM
MD
LG