Kuhlelo lwamasiko lokuphila kwabantu nsukuzonke ngoLwesibili sixoxe ngesiko elikhanya lilokhe liqhutshwa yizizalwane zeZimbabwe ezihlala emazweni.
Ekadeni emkulwini bekuvele kuyindawo ebhekane labesifazane akade bedinga inkuni zokupheka, bagesiza imiganu lembiza njalo bebonda imbiza ngobuciko obuphezulu. Bekulihlazo ukubona owesilisa esenza konke lokhu loba nje kade beyosa inyama nxa kuthethwa amacala enkosini kumbe enduneni.
Lokhe kunjalo-ke endaweni ezinengi eZimbabwe ikakhulu emaphandleni lapho abantu makhaza ababamba owangaphansi nxa bebona owesilisa ebonda isitshwala eziko.
Kodwa-ke izizalwane zeZimbabwe ezisuka ekhaya ziye emazweni ziyaguqula indlela eziphatha ngayo ezemkulwini njengoba abesilisa bephathisana lemuli zabo ekwenzeni konke okuhambelana lemicimbicimbi yangekhaya ebibhekane labesifazane.
Kambe isiko leli liyafiphala kumbe lokhe ligcinwe zimuli ezivela eZimbabwe? Ukuze sihlaziye udaba lolu sixoxe loMfundisi Raphael Mthombeni owokholo isiChristu othe kuyamangalisa ukuthi isiko leli liqhubekela phambili.
“Kodwa-ke ngibona engani kumele abesifazane labesilisa babambisane ezindlini njengoba omama sebesenza imisebenzi etshiyeneyo. Kuhle ye ukuthi owesifazane aphekele owesilisa lobanje lokhu kungenziwa njalo ngowesilisa.
“Ngilethemba lokuthi kuzacina kuphela konke lokhu njengoba abesifazana besabenza gadalala eMelika.”