Iqembu le Makepekepe lihwithe layahlala phezu kwengalane ngemva kokunqoba iqembu le Border Strikers nge 3 ka 1 ngeSonto okuyimpumela ekhuphule inani layo lemiklomelo laya kumatshumi amahlanu lantathu (53).
Iqembu ebelikhokhela phambilini kwemidlalo yangempelaviki ele FC Platinum lehle layahlala kundawo yesibili lilemiklomelo engamatshumi amahlanu lanye (51) ngemva kokutshaywa nge 2 ka 1 liqembu le Harare City.
Kundawo yesithathu kuleqembu le Highlanders lona elilemiklomelo engamatshumi amahlanu njalo elinqobe ele Chapungu nge 1 ka nya.
Kusele imidlalo emine kusizini yalonyaka njalo olandela iqembu le Highlanders uSibonakaliso Ndlovu uthi yena kungenzeka ukuthi imidlalo ithi ifika komlindi uyacina iBosso kuyiyo ehlezi esiqongweni.
Kumidlalo emine eseleyo kusizini yalonyaka iqembu le Caps United lizadlala lele Dynamos, iHarare City, iNgezi Platinum kanye le Chapungu.
Iqembu le FC Platinum lona lizadibana le Ngezi Platinum, iChapungu, iHighlanders kanye le Tsholotsho.
Iqembu leBosso lona lizadlala le Bulawayo City, iTsholotsho, iFC Platinum kanye le Hwange.
Ngaphansi kwengalane kungaba yisimanga nxa iqembu le Border Strikers lingasinda ekugunyulweni kusigaba se PSL njengoba lilemiklomelo elitshumi lane (14) ngemva kokudlala imidlalo engamatshumi amabili lesithupha.
Impi eyokusinda ekugunyulweni kusigaba saphezulu iphakathi kweqembu le Tsholotsho, elihlezi kundawo yesibili nxa usuka ngaphansi kwengalane lilemiklomelo engamatshumi amabili, leqembu le Mutare City elihlezi endaweni yesithathu nxa usuka emsileni lilemiklomelo engamatshumi amabili lambili.
Iqembu le Tsholotsho libe ngutshiki lobhanqa 1 – 1 lele Ngezi Platinum ngoMgqibelo njalo lizadlala lele Chapungu ngempelaviki ezayo kuthi ele Mutare City Rovers lona elibe ngutshiki lobhanqa 0 -0 lele How Mine lizadlala lele Border Strikers.
