amalinks wokungena

Kwethulwa iMobile App Yokukhankasela uTsvangirai leMDC-T Kukhetho Oluzayo

  • Mavis Gama

Ibandla leMDC-T lisungula uhlelo lokukhulumisana kumakhalekhukhwini kusetshenziswa okuthiwa yi-mobile app.

Kusehlakalo esibonwa ngabanengi njengendlela yokuhambelana lokwenzakala kulezinsuku kwezokwethulwa imbiko lokukhulumisana, ibandla leMovement for Democratic Change elikhokhelwa nguMnu. Morgan Tsvangirai selisungule uhlelo lwabomakhalekhukhwini lokukhankasa kukhetho oluzayo kusetshenziswa okuthiwa yi-mobile app.

Imobile app le ethiwa “Morgan Tsvangirai 2018”, esungulwe mhlaka 18 ngoMabasa, isebenza kubomakhalekhukhwini bakulez’insuku, ama Smart Phone engaba ngama i-Phone, ama iPad loba ama Android.

Nxa umuntu ethe waba layo kumakhalekhukhwini wakhe, uyenelisa ukufinyelela ikhasi lebulenjini, i-web page, etshengisa okunengi okwenziwa ngumkhokheli weMDC-T, uMnu. Morgan Tsvangirai lebandla lakhe.

Ibandla leMDC-T lisungula uhlelo lokukhulumisana kumakhalekhukhwini kusetshenziswa okuthiwa yi-mobile app.
Ibandla leMDC-T lisungula uhlelo lokukhulumisana kumakhalekhukhwini kusetshenziswa okuthiwa yi-mobile app.

Umuntu ulakho ukubuza imibuzo, ukuthenga impahla eyehlukeneyo yebandla leMDC-T loba ukufakela leli bandla usizo lwemali.

UMnu. Nigel Gambanga, ingcwethi kwezokusetshenziswa kwemitshina yakulezi nsuku lezokukhulumisana eye ICT, osebenza ezimele, uthi ukusungulwa kweApp le, kuyisibonelo ukuba ibandla leMDC-T lihambelana lokwenzakala emhlabeni wonke jikelele.

Kodwa uGambanga uthi lanxa inengi labantu elizweni lisebenzisa omakhalekhukhwini bohlobo lwama Smartphone, ayenelisa ukufinyelela indlela zokukhulumisana zebulenjini, inengi lisebenzisa kakhulu ama Apps awe WhatsApp leFacebook, ngoba ebiza intengo ephansi. Ngakhoke akaboni kusiba lula ukuyisebenzisa iApp le kwabanengi, ikakhulu abemaphandleni.

UMnu. Soul Kabweza, umhleli welinye lamaphephandaba eZimbabwe apuma ebulenjini be internet, okuthiwa yiTechzim, uvumelane lokwethulwa ngu Kabweza.

Eminyakeni eyedluleyo, ibandla leMDC-T lake lasungula uhlelo lokukhulumisana kusetshenziswa umakhalekhukhwini libambisana leEconet Wireless lisenzela ukukhulumisana lula labalandeli balo.

Lwamiswa uhlelo lolu ngemva kokwethuselwa kwabe Econet.

Isikhulumeli sika Tsvangirai, uMnu. Luke Tamborinyoka, walile ukuthuluma ngohlelo lolu.

Amabandla aphikisa elibusayo ajayele ukukhala ngokuthi ibandla leZANU PF kalibavumeli ukuba basebenzise imisakayo yelizwe kumbe amaphepha adlelana lohulumende ukwenzela ukuba bakhulumisane labalandeli babo.

Ingcwethi zemitshina ye-ICT zithi ukuba khona kwabomakhalekhukwni ama Smartphone kanye lobulembu be Internet, kulakho ukusiza abamabandla aphikisayo ukuluqeda loludubo.

Sokulabantu abambalwa asebelobe imibono yabo kule i-website, besebenzisa leyo App.

Facebook Forum

XS
SM
MD
LG