UMongameli Robert Mugabe uthi uhulumende kasoze avikele iziphathamandla ezintshontshayo kumbe ezenza ukungethembeki.
Ungezelele esithi kasoze akhuthaze ukubotshwa kweziphathamandla kungelabufakazi.
Ekhuluma embuthanweni wokuphawula isikolo seMurongwe Primary School eDande esigabeni seMashonaland Central ngoLwesine, uMugabe uthe uzulu engabolandela okuphuma kumaphephandaba ngoba okunye kwakhona kungamanga.
Uthe ibandla lakhe limanyene hatshi lokho okukhunywa ngabanye abantu abathi kulokuxokozela okumangalisayo kubandla leli.
Kusenjalo, ingcwethi kwezokulondolozwa kwenotho yelizwe zikhuthaza uzulu ukuba amanyane ekudingeni indlela ezingasetshenziswa ukuqeda udubo lokungethembeki kwenkokheli, icorruption ngesilungu, ephezulu elizweni njengoba kungekho osekuthe kwenziwa ngamapholisa abona ngezokuthoniswa kwamacala kanye labenhlanganiso ye Anti-Corruption Commission.
Imibono le ivezwe emhlanganweni wokubonisana phezu kokwanda kwezehlakalo zokutshaphazwa kwemali mahlayana lokungathembeki kwenkokheli elizweni kakhulukazi ezikuhulumende.
Lumhlangano owenzelwe eMeikles Hotel obuqoqwe ngabe Transparency International Zimbabwe kade ulesihloko ebisikhangela udaba lokutshaphazwa kwemali yeZIMDEF esithi ‘Reflections from the ZIMDEF Alleged Scandal, Is It Tribal/Factional/Structural’.
Lokhu kuza ngemva kobufakazi bokutshaphazwa kwemali yezifundi ngumphathintambo wemfundo yaphezulu uProfessor Jonathan Moyo okuvumayo lokho lanxa ekubeka ngendlela yokuba kungamelanga ajeziswe njengoba wayisebenzisa kunhlelo zebandla lentuthuko yesigaba se Tsholotsho.
Kukhethwe udaba lukaMoyo olusegudwini lezinsuku agiya ngalo esithi loba wayeba leyo mali ngenhloso yokuthuthukisa isigaba seTsholotsho wathengela inkokheli yomdabu amabhayisikili kanye lokusekela ezinye zenhlelo ebandleni le Zanu PF.
Kodwa umkhokheli wenhlanganiso ekhuthaza ukuphila kungela kungethembeki, iTansparency International Zimbabwe, uNkosazana Mary Jane Ncube, utshele umhlangano lo ukuthi uzulu kumele atshengise ukucunuka kwakhe ngoMnu. Moyo.