amalinks wokungena

Mugabe: Ilizwe leZimbabwe Lithuthuke Okumangalisayo

  • Bennedict Nhlapho

FILE - UMongameli Robert Mugabe.

IZimbabwe ngelinye lamazwe athuthukileyo kakhulu kuzwekazi leAfrica njalo akusiloqiniso ukuthi lilizwe elilobuyanga.

Langamazwi ethulwe nguMongameli Robert Mugabe ngoLwesine emhlanganweni womhlaba jikelele ohlaziya ngezomnotho zezwekazi le Africa, owe World Economic Forum on Africa, ongene kulanga lesibili eDurban kweleSouth Africa.

Esethula umbiko wakhe kumanxusa asemhlanganweni lo wezomnotho eDurban, umongameli Mugabe usole labo abathi iZimbabwe lilizwe elilobuyanga njalo eselisiwa esithi lokhu akusilo qiniso.

“IZimbabwe ngelinye lamazwe athuthuke kakhulu kuzwekazi leAfrica. Ngaphandle kweSouth Africa, ngifuna ukuba kwazi ukuthi yiliphi elinye ilizwe okungathiwa lilentuthuko edlula eyeZimbabwe?”

UMongameli Mugabe uthi iZimbabwe lilizwe elinothe kakhulu kwezenjiwayo, elilabantu abafundileyo ukwedlula amazwe eAfrica kanti lonyaka uthi lizatshaya inala enkulu nxa sekuvunwa.

“Yebo silazo inhlupho zethu, kodwa iqiniso yikuthi asisilo lizwe elilobuyanga, njalo asisilo lizwe elingabhidlika loba nini. Silenotho enengi elizweni kodwa omunye uthi singabhidlika loba nini. Lowo otshonjalo ukhululekile ukuthi azitshololo lokho. Lami nginje ngingathi i Melika ingabhidlika loba nini.”

Ngokutsho kwenhlanganiso yezisebenzi eye Zimbabwe Congress of Trade Unions (ZCTU) isilinganiso sabantu abangasebenziyo eZimbabwe sesifika kumatshumi ayisitshiyagalolunye ekhulwini (90%). Lokhu kutsho ukuthi phose ilizwe lonke seliphila ngokwenza imisebenzi yezandla, ukuthengisa leminye eyokuziphilisa.

Isizalwane seZimbabwe, uMnumnzana Bigfoster Nkomose, uthi kuyethusa ukuthi ilizwe lithi lifile, abantu behlupheka okwesabekayo, izigidi sezibalekele kwamanye amazwe, kuzwakale umongameli esithi iZimbabwe inothe okwedlula wonke amazwe eAfrica.

“Mina ngisola bona abantu bakuleliya lizwe ukuthi bathi umuntu osegugile abephiwa isikhathi sokuthi akhulume. Ayikho into azoyikhuluma. Umuntu nxa eguga ubuyela emuva. Ayisekho anye into esingayilindela kuye. Umuntu ma eqala eguga bakithi kusuke kuphele konke ngaye. Ayikho enye into okufanele siqhubeke silokhu sisiyayibuza yena.”

Intsha yebandla leZAPU umnumnzana Carnicous Nkala uthi lobanje engamangaliswa yinkulumo kamongameli Mugabe, yinkulumo edanisayo kakhulu.

“Umongameli ngumuntu esimnbonayo ukuthi usemdala kakhulu njalo kuyabonakala kuyezwakala ukuthi umuntu ma esibamdala usesiba yingane. Angeke sibe ngabantu esisuka sidumale ngokwenza kwakhe. Simazi njengomuntu lo ongelalo iqiniso, akakaze waba lalo iqiniso.”

Isiphathamandla sebandla le Progressive Democrats of Zimbabwe umnumnzana Andrew Nyathi yena uthi kuyethusa ukuzwa umongameli welizwe eselibhadalisa imali yesikolo ngembuzi, esithi ilizwe lami linothile.

“Akayazi nje yena into ayikhulumayo, so uncomo uma ezithulele, so kuqakathekileke ukuthi abantu bangatshoni belalela into ezikhulunywa nguRobert Mugabe ngoba ukhuluma into engekho. Amamiliyoni lamamiliyoni abalekile elizweni ebalekela ukuthi igovernment yakhe isibulele ilizwe, ibulele inotho, ibulele yonke into.”

Umhlangano lo wezomnotho ungenwa ngamanxusa avela emhlabeni wonke jikelele, kantike lonyaka inhloso ngeyokukhanda amacebo angasiza izwekazi le Africa ukuthuthukisa ezomnotho walo. Umongameli Mugabe unxuswe ndawonye kanye lenkokheli zamabandla amakhulu aphikisayo, ngenhloso yokuthi kulo umhlangano kukhulunywe ngodaba lokuthi kuyini okungenziwa ukuvuselela umnotho weZimbabwe.

Facebook Forum

XS
SM
MD
LG