Bekungabizwa ozwayo emkhosini wokunanza ilanga lokuzalwa kukaMongameli Robert Gabriel Mugabe oqoqwe luhlangothi lwabatsha lweZanu PF abe21st Movement eRhodes Estate Preparatory School eMatopo ngoMgqibelo lapho inkulungwane lenkulungwane zabantu ezisuka phandle kwezigaba zeMaNdebeleni ezize ngobunengi ukuzojabula lemuli kaMongameli.
Selidume ledlula eMatopo lapho inkulungwane lenkulungwane zabantu bezinyathelana zingena ziphuma emkhosini lo zatshiya umgwaqo oya eMatobo usufile kungesibutshapha kodwa kuyibunengi bezimota.
UMongameli Robert Mugabe utshele lumkhosi ukuba kasoze adedele omunye esikhundleni sakhe uthe yena kayindawo njalo usaselamandla okuqhubeka ebusa njalo kazifakanga embusweni kodwa wakhethwa.
Osakhulayo, uNdodana Moyo uthe kunzima ukubona umuntu owabulala abantu ezojabula phezu kwamathuna abo.
Olwela amalungelo oluntu uMnu. Mbuso Fuzwayo uthi kulusizi ukubona inkokheli isenza idili elikhulu kusigaba esingumakhelwane abantu begalula kumpopoma zamanzi.
Isikhulumi sebandla leMRP, uMnu. MBonisi Gumbo laye uthe kuyadanisa ukubona inkokheli ichitha imali bona abantu bedubeka iphinde iyalele embusweni yona isilikhehla.
Abameli bakwamanye amazwe eZimbabwe labo baze ukuzohlanganela lemuli kaMongameli ukujabulela leli langa Abasekeli bakaMongameli bajabulise abantu ngokuphakamisa inyawo begida lokuhlabela. Ekuseni lapho imota zisiya lanxa seziphenduka koBulawayo umgwaqo weMatopo ubungahambeki.