Abeqembu lomdlalo wenguqu ele Highlanders bathi basifuna ngamehlo abomvu isicoco se Premier Soccer League (PSL) ngemva konkunqoba abakwenze ele Dynamos ngeSonto.
Ukunqoba kweqembu le Highlanders elikwenze ele Dynamos nge 2 ka 1 emdlalweni oqhutshelwe enkundleni ye Barbourfields sekukhuphule ithemba kubabadlali baleliqembu ukuba iphupho lokuphakamisa isicoco sePSL lisaphila.
Iqembu le Highlanders lilemiklomelo engamatshumi amane lanye njalo litshiywa ngemiklomelo eyisithupha liqembu elihlezi phezu kwengalane ele FC Platinum lona elinqobe ele How Mine nge 1 ka nya ngeSonto njalo elilemiklomelo engamatshumi amane lesikhombisa.
Kundawo yesibili kuleqembu le Caps United lona elilemiklomelo engamatshumi amane lesithupha njalo elinqobe ele Chicken Inn nge 1 ka nya ngeSonto.
Ekhuluma lentathelizindaba zemidlalo ekupheleni komdlalo wabo leDeMbare, imvimbi yeqembu le Bosso uPeter Muduhwa uthe bazimisele njengeqembu leHighlanders ukuphakamisa isicoco ekupheleni kwesizini yalonyaka.
“Sikhangelele ukuthatha ama points wonke njalo sifuna ichampionship. Silanda iHarare City emdlalweni olandelayo mhlawumbe yiyo engasikhathaza kodwa angiboni.”
Ngaphansi kwengalane lapho okulempi yokusinda ekugunyulweni kusigaba saphezulu, ikhuba liyala lilokhu litshona kuqembu le Border Strikers lona elihlezi emsileni lilemiklomelo elitshumi lantathu njalo elitshaywe nge 1 ka nya liqembu leTsholotsho elihlezi endaweni yesibili nxa usuka ngaphansi kwengalane lilemiklomelo elitshumi lathoba munwe munye.
Endaweni yesithathu nxa usuka emsileni kuleqembu le Mutare City lona elilemiklomelo engamatshumi amabili njalo elinqobe ele Triangle nge 2 ka nya ngeSonto.
Kusele imidlalo eyisikhombisa ukuba imidlalo yesigaba se PSL ifike komlindi uyacina.
Emidlalweni yenguqu edlalwe kwamanye amazwe, iqembu le Manchester City linqobe ele Manchester United nge 2 ka 1 kweleNgilandi.
Limpumela itshiye iqembu le Manchester City lihlezi phezu kwengalane yemiklomelo lilemiklomelo elitshumi lambili njalo kuyilo lodwa eselinqobe kuyo yonke imidlalo emine esidlalwe kusizini ka 2016/17.
Elizweni le Spain iqembu le Real Madrid litshaye ele Osasuna nge 5 ka 2 njalo lilemiklomelo eyithoba munwe munye ngemva kwemidlalo emithathu ikanti iqembu le Barcelona linqotshwe nge 2 ka 1 ngele Alaves njalo lilemiklomelo eyisithupha.