Iqembu lenguqu ele Tsholotsho seliqalile amalungiselelo alo wokuphatheka emidlalweni yalonyaka eyesigaba sa[hezulu ese Premier Soccer League.
Iqembu le Tsholotsho lona elisinde ngesikhala senalithi ekugunyulweni kusigaba se Premier Soccer League nyakenye, liqale ukuzilolonga kuliviki enkundleni ye White City.
Sekulamaviki ambalwa amanye amaqembu aqala amalungiselelo alonyaka obesekudale ukuba abalandeli bomdlalo wenguqu bazibuze ukuba iqembu le Tsholotsho lisasekhona na njengoba belibhekane lodubo lwemali nyakenye.
Umqeqetshi wabonozinti beqembu leTsholotsho, uFarai Sibanda, uthi lonyaka bakhangelele ukuba isimo sizakuba ngcono kulanyakenye.
“Sesiqalisile njengoba sasilinde ukuba umnyaka uqale sibone ukuba yikuyini okuthatha indawo njalo izinto kukhanya zifuna ukusilungela njengoba nyakenye sike sadonsa nzima.”
Iqembu le Tsholotsho lilahlekelwe ngumqeqetshi uLizwe Sweswe yena othethwe liqembu le FC Platinum kwathi abadlali abambalwa labo badinage amadlelo amatsha.
Laba ngabagoqela uMcClive Phiri yena othengwe liqembu le Ngezi Platinum kanye lo Zimiseleni Moyo othethwe liqembu le Zanaco elase Zambia.
Kulabadlali abatsha abambalwa abazilolonga leqembu leTsholotsho bedinga umsebenzi kodwa uSibanda uthe yena abanye abadlali ababedlala kubo bayeza basendleleni.
“Abafana bakhona loba nje kulabanye abalokhu beseHarare kodwa basendleleni njalo abangabe bengekho okwamanje bengabe bebane kuphela.”
Abadlali ababedlalela iqembu le Tsholotsho nyakenye abaphendukileyo kuleliqembu ngabagoqela uOcean Ncube, uThando Ncube, uAyanda Ncube, uDilloan Chivandire kanye lo nozinti uNickel Marichi.
Iqembu leTsholotsho liqede imidlalo yalo yanyakenye selithola nzima imali njalo liphutshe imidlalo yalo likundawo yesithathu nxa usuka emsileni wengalane.