Ikhuba liyala lilokhu litshona kuqembu le Tsholotsho ngemva kokuba linqotshwe ngele Harare City nge 1 ka nya emdlalweni we Castle Premier Soccer League odlalwe ngoMvulo emini.
Sekuzakuba nzima ukuba iqembu lomdlalo wenguqu ele Tsholotsho lisinde ekugunyulweni kusigaba se Castle Premier Soccer League ngemva kwempumela yomdlalo lo.
Leliqembu belilethuba elokuqansa phezu kweqembu le Mutare City lona elilemiklomelo engamatshumi amabili lanye ngemva kwemidlalo engamatshumi amabili lanhlanu.
Iqembu le Tsholotsho lona lilemiklomelo elitshumi lathoba munwe munye ngemva kwemidlalo engamatshumi amabili lanhlanu njalo lihlezi kundawo eyesibili nxa ukuka ngaphansi kwengalane.
Loba kunjalo umqeqetshi weqembu le Tsholotsho uLizwe Sweswe usaselalo Ithemba lokuba iqembu lakhe lizayala lilokhu lidlala kusigaba se PSL ngomnyaka ozayo.
Iqembu le Harare City likhuphuke layahlala kundawo yesithupha lilemiklomelo engamatshumi amathathu lanhlanu njalo abadlali baleliqembu abalitshayele emambuleni ngabathi uRaphael Manuvire kanye lo Grey Kufandanda.
Iqembu le Highlanders liyale lilokhu liphefumulela entanyeni yeqembu elihlezi phezuLU kwengalane ele FC Platinum ngemva kokunqoba elikwenze ele Ngezi Platinum nge 2 ka 1 enkundleni ye Barbourfields ngeSonto.
Umdlali weqembu le Bosso uPeter Muduhwa uthi bajabule kakhulu ngokwenelisa ukunqoba.
Iqembu le Highlanders likundawo yesithathu engalaneni njalo lilemiklomelo engamatshumi amane lesikhombisa ikanti iqembu le FC Platinum lilemiklomelo engamatshumi amahlanu lanye.
Kundawo yesibili kuleqembu le Caps United elilemiklomelo engamatshumi amahlanu.
Kusele imidlalo emihlanu ukuba imidlalo yalonyaka eyesigaba se Castle Premiership ifike komlindi uyacina okutsho ukuba kulemiklomelo elitshumi lanhlanu engatholwa ngamaqembu alwisa ukuphakamisa isicoco lalawo afuna ukusinda ekugunyulweni kusigaba saphezulu.