Inani lezizalwane zeZimbabwe ezisebenza kwele Botswana seliyehlile ngesikhathi ilizwe lelo selithethe isinqumo sokugcinele aMatswana imisebenzi eqakathekileyo enjengokufundisa ezikolo.
Inombolo ezisanda kwethulwa lugatsha lukahulumende olweStatistics Botswana, lutshengisa ukuthi abavela eZimbabwe besebenza eBotswana okusemthethweni selehle okumangalisayo lisuka kunkulungwane eziyisikhombisa eminyakeni embili edluleyo lawela kunkulungwane ezimbili lamakhulu amane - 2,419.
Inani labasebenza eBotswana bevela kwamanye amazwe lingaphezu kwenkulungwane eziyisithupha - 6,527 - okutsho ukuthi abeZimbabwe bayisilinganiso esingamatshumi phose amane ekhulwini (37percent) uma kuhlanganiswa inani lezisebenzi zabavela phandle.
Inengi ngabesilisa abasephethe amaphepha okusebenza eBotswana bengaphezu kwamatshumi ayisikhombisa (70 percent) ekhulwini uma kuqathaniswa labe sifazane.
Abasebenza emapulazini kanye lekwakheni yibo abahamba phambili belamaphepha okusebenza.
UNkosazana Ireen Dlomo osebenza eGaborone uthi ukwehla kwenani labaphiwa amaphiwa ngomlayezo obalulekileyo usuka eBotswana, ikakhulu kumazwe anjenge Zimbabwe.
“Kusobala ukuthi izikhathi sezintshitshile. Akuseyiyo Botswana esiyaziyo amaphepha engasatholakali lula, njalo kungumlayezo ocacileyo ikakhulu kulizwe elifana leZimbabwe ukuthi asilungiseni inkinga zethu ukuze sinelise ukusebenza ekhaya hatshi kwamanye amazwe.”
UNkosikazi Silethemba Mhlanga yena uthi inombolo ikakhulu ngabeZimbabwe ayisiso siboniso esiqondileyo ngoba kulenengi elebenza lingelamaphepha, kulenkulungwane lenkulungwane ezingena eBotswana ngudlu.
“Siyakwazi ukuthi banengi abasebenza bengalamaphepha, inengi lingena malanga wonke lingelamaphepha eBotswana.”
EleSouth Africa, elilezisebenzi kuzikhundla eziphezulu ikakhulu emigodini eyemba amatshe aligugu Kanye lezigaba eziphatha ezemali, bayalandela phose ngenkulungwane ezimbili.
Amanye amazwe afana laboZambia, Kenya, India kanye leChina ayalandela eyabelana inkulungwane ezimbili eziseleyo.