amalinks wokungena

Breaking News

Callisto Pasuwo: Sesikwazi Okumele Sikwenze Emdlalweni yeAFCON


The Zimbabwe Warriors
The Zimbabwe Warriors

Ukungenelisi ukusebenzisa amathuba eliwatholileyo kuphazamise iqembu lama Warriors emdlalweni walo lele Algeria emncintiswaneni we Africa Cup of Nations ngeSonto kodwa umqeqetshi waleliqembu le Callisto Pasuwa uthi basifundile isifundo sabo.

Kusele kancane ukuba iqembu le Zimbabwe liphutshe umdlalo walo lele Algeria lithethe yomithathu imiklomelo kodwa lawa maqembu acine esabelana umklomelo owodwa iqembu ngalinye ngemva kokuba umdlalo uphele zingutshiki lobhanqa 2 ka 2.

Abafana beZimbabwe badlale ibhola elinathisa amanzi ngehlandla lakuqala elomdlalo lona eliphele bekhokhela nge 2 ka 1 kodwa isimo siguqukile ngehlandla lesibili lapho ibhola ebesilidlalela kucele leqembu le Zimbabwe okwesikhathi eside.

Loba kunjalo abekhona amathuba awokuba iqembu le Zimbabwe lihlohle obekungenza linqobe kodwa kaliwasebenzisanga amathuba lawo.

Ekhuluma lentatheli ekupheleni komdlalo umqeqetshi weqembu lama Warriors uPasuwa uthe ukudlalisa amathuba kubalahlise kakhulu.

“Emidlalweni efana lale kuqakathekile ukusebenzisa amathuba esiwatholayo ngoba sithe ngemva kokukhutha bona bayahlohla kodwa sifundile isifundo sethu ukuba kumidlalo elandelayo singadlalisi amathuba.”

Abanye abalandeli bomdlalo wenguqu basole uPasuwa labanye bakhe ngokungadlalisi umgadli odla amahabula kwele South Africa edlalela iqembu le Orlando Pirates uTendai Ndoro yena ohlale phandle umdlalo waze waphela.

Obukele lumdlalo kumabonakude uVusumuzi Ndlovu uthi abaqeqetshi kuzamele balungisise ekukhetheni abadlali nxa befuna ukuphumelela.

“Umdlalo ubumnandi sibili ekuqaleni kodwa ngehlandla lesibili iAlgeria ibisibuya kakhulu njengoba iqembu le Zimbabwe beselivimba kokuphela.

“Amathuba sisalelawo kodwa okufakala ukuthi kwenziwe yikuba umqeqetshi kumele ananzelele abadlali abafakayo besiyadlala ngoba njengayizolo umuntu onjengo Ndoro ubengancedisa kakhulu.”

Udaba Esilethulelwe NguJoseph Njanji
please wait

No media source currently available

0:00 0:02:10 0:00
Lapho esitholakala khona

Komunye umdlalo wesibaya sika Group B iqembu le Senegal linqobe ele Tunisia nge 2 ka nya.

Limpumela itsho ukuba iqembu le Senegal yilo elihlezi phezu kwengalane lilemiklomelo emithathu kuthi iAlgeria le Zimbabwe zilomklomelo owodwa iqembu ngalinye kuthi ele Tunisia lileqanda.

Iqembu le Zimbabwe ngoLwesine lizadibana lele Senegal ngehola lethoba munwe munye ebusuku ikanti phambilini kwalumdlalo iqembu le Algeria liyabe lidlale lele Tunisia ngehola lesithupha ntambama.

XS
SM
MD
LG