amalinks wokungena

Siyahlamuka Isigaba seMashonaland Central Phezu Kobukhokheli beZanu PF

  • Ntungamili Nkomo

Isigaba seMashonaland Central kubandla leZanu PF sithi sifuna abasekeli bakaMongameli Mugabe bakhethwe ngamalunga aleli bandla hatshi nguMugabe.

Isigaba lesi sithi njalo omunye wabasekeli bakaMugabe kumele abe ngumuntu wesifazana.

Umgcinisihlalo weMashonaland Central uMnu Dickson Mafios utshele iphephandaba leHerald ukuthi ukukhetha abasekeli bakaMugabe kumele kube ngumlandu wezigaba zonke zebandla leli, hatshi okaMugabe.

Eminyakeni edluleyo abasekeli bakaMugabe bebekhethwa ngamalunga eZanu PF, kodwa lokhu kuguqulwe libandla leli emizameni yokwenqabela ukudlephana okukhona.

Sokulokucabangela ukuthi iziphathamandla zeMashonaland Central zilakho ukuxotshwa kuZanu PF njengabanye abagoqela uNkosikazi Joice Mujuru.

Kodwa ummeli wePelandaba-Mpopoma edale lephalamende njalo elilunga leZanu PF uMnu Joseph Tshuma utshele iStudio 7 ukuthi amalunga ebandla lakhe alelungelo lokuveza imbono yawo.

“Ibandla leZanu PF libandla elikhulu elilamalunga alembono etshiyeneyo njalo umuntu wonke uyavunyelwa ukutsho akucabangayo,” kutsho uMnu Tshuma.

“Kodwa okuslayo yikuthi intando yabanengi yiyo elandelwayo.”

XS
SM
MD
LG