Obengumkhokheli wabasakhulayo oxotshwe kuZanu PF uMnu Pupurai Togarepi uthi akakwamukeli ukuxotshwa kwakhe kulelibandla.
UTogarepi uxotshwe ngabasakhulayo ngoMvulo bemethesa icala lokwekela umntanakhe ehlambaza uMongameli Mugabe lomkakhe.
Kodwa uMnu Togarepi uthi okwenziwe ngabasakhulayo laba ngamadlwane ngoba uMongameli Mugabe nguye yedwa olamandla okumxotsha ebandleni.
Abanye abasakhulayo abaxotshwe kuZanu PF kunsukwana ezedluleyo baqhubeka behlambaza uMugabe besithi wenza njengomuntu osephambene.
Bathi uMugabe lomkakhe, uNkosikazi Grace benza ibandla leZanu PF elabo kanye lelizwe leZimbabwe.
Ingcwethi kwezombusazwe uMnu Nkululeko Sibanda uthi uMugabe wenze iphutha lokuvumela wonke umuntu ebandleni lakhe ukukhuluma ngodaba lokuthi ngubani ozathatha isikhundla sakhe, yikho nje bengasamhloniphi.
