Abaqoqe umhlangano wamazwe womhlaba obuphezu kokulwisa ukumemetheka kwegcikwane lengculaza owe 2016 International Aids Conference, owenzelwe eDurban kweleSouth Africa, bakhuthaze abakade beze kiwo ukuthi bayeqala umsebenzi omkhulu emazweni abo ukulwisa ngamandla lumkhuhlane ukuze ube usuphelile kusiya fika umnyaka ka2030.
Ngemva kwamalanga amahlanu kuxoxwa ngokumisa ukumemetheka kwegciwane lengculaza, ukwelatshwa kwalabo asebelalo kanye lokudinga umuntu ngokuqeda lo umkhuhlane, amanxusa abhekise amabombo emakhaya ngoLwesihlanu.
Lobanje kukunengi osekwenziwe kusukela ngesikhathi somhlangano womhlaba jikelele wokuqala emhlabeni jikelele eminyakeni engamatshumi amabili lanye edluleyo, ingciwane lengculaza selingene kwabanengi, labulala izigidi kanti njalo izigidi ziqhubeka zilithola.
Leyinto eyenze abaqoqe umhlanganolo bakhuthaze umhlaba wonke ukuthi usukume ulwise lesi sifo ngoba nxa kungenjalo abantu bazaphela.
Unkosikazi Olive Shisana ubengomunye wabomgcinisihlalo womhlangano walonyaka.
Umphathintambo wezempilakahle kweleSouth Africa umnumnzana Aaron Motsoaledi yena uthi kufanele kuqalwe umkhankaso wokulwisa ingculaza ozakhokhelwa ngabatsha, ukuze kusungulwe usendo olungelagciwane.
Inhlanganiso ye UNAIDS yona ikhuthaze ukuthi kuyekwenziwa konke okuvunyelwene kulo umhlangano ukuze ingculaza ibe isiphelile ukusiyafika u 2030.
Osethethe isikhundla senhlanganiso ye International Aids Society uNkosikazi Linda Gail Bekker unxuse abaxhasa ngemali ukuthi bahlenge imiphefumulo.
Izikhulumi zonke zikugcizelele ukuthi ukuthokalala kwemali yikho okuzakwenza kungabi lento evimbela ukulwiswa kwengculaza.
Umbiko osemqoka kwabangene lumhlangano ubungowokuthi lobanje umhlangano usuphelile, umsebenzi omkhulu wokuyalwisa ingculaza wona usuqalile.
