Onqobe kukhetho lommeli weNorton edale lephalamende ngeviki edluleyo uMnu Temba Mliswa ufungiswe ukuqala umsebenzi edale ngoLwesine wathakazelelwa ngamalunga amabandla wonke, agoqela aweZanu PF.
UMnu Mliswa uncintise kulolu khetho elilunga elizimeleyo ngemva kokuxotshwa kubandla elibusayo wanqoba obemela iZanu PF uMnu. Ronald Chindedza loMnu. David Choga owebandla leNational Constitutional Assembly (NCA).
Ekufungisweni kwakhe, kube lokuthokoza okukhulu edale amalunga amabandla atshiyeneyo ememeza emhaya esithi uMnu Mliswa uyinkunzi yangempela.
UMliswa, yena owake waba lilunga ledale, utshele iStudio 7 ukuthi laye uyathokoza ngokubuyela ephalamende. Uthembise ukuthi uzazimela izifiso zabantu beNorton ngokugcweleyo.
Ummeli weBinga North edale njalo elilunga leMDC-T uMnu. Prince Dubeko Sibanda utshele umsakazo lo ukuthi uMliswa yindoda emadodeni engakwaziyo ukutshaya inja ifihla umphini.
