UMongameli Emmerson Mnangagwa uthi kungumlandu womuntu wonke oyisizalwane seZimbabwe ukubona ukuba imali entsha eyeZimbabwe Gold iyamukelwa.
Uphinde wathi uhulumende wakhe wenza konke okusemandleni akhe ukuthuthukisa umnotho weZimbabwe ngakho-ke kuqakathekile ukuthi uzulu laye abambisane lohulumende ukuze kubelengqubekela phambile elizweni. Loba kunjalo, banengi abathi kabathakazeleli uzibuse.
Ekhuluma namuhla emkhosini wokuthakazelela iminyaka engamatshumi amane lane -44 kazibuse, eMurambinda esabelweni seManicaland, uMnangagwa wazise ukuba umnotho welizwe uzathuthuka ngenxa yokusetshenziswa kwemali entsha le.
"Kungumlandu womuntu wonke ukubona ukuba siyasebenzisa imali yethu. Imali le ilamandla kakhulu ngoba isekelwa ligolide"
Uqhubeke esithi lobanje abanengi bengayethembi limali, yiyo yodwa indlela ezakwenza ukuba umnotho weZimbabwe uthuthuke. Abantu abanengi bathi imali le ifana leyohlobo lwama bond kanye lama bearers’ cheques.
UMnangagwa ekhuluma emkhosini lo, eleMelika lifisele abantu bakwele Zimbabwe usuku oluhle lisithi lizaqhubekela phambili lisekela uzulu obhekane lenhlupho ezitshiyeneyo.
Umbiko lo wethulwe ngophethe uhlangothi lukahulumende weMelika olubona ngokudlelana lamanye amazwe, uMnu. Anthony Blinken. Kusenjalo, uMnangagwa uqhubekele phambili esithi akulamuntu ozabulawa yindlala lonyaka eZimbabwe.
"Sizabona ukuba lobanje kulendlala eyesabeka kangaka wonke umuntu uzathola ukudla. Akula muntu ozabulawa yindlala"
Omele isigaba seMatabeleland South edale leSenate uNkosazana Nonhlanhla Mlotshwa, uthi abantu babhekane lobunzima obumangalisayo, obugoqela ukusetshenziswa kwemali entsha eyeZimbabwe Gold kumbe iZiG.
"Kuzakuba nzima ukuba limali isebenze ngoba vele kulendlala njalo imali le kayithenjwa ngabantu abanengi."
Omele isigaba seBulawayo North edale lephalamende, uNkosikazi Minenhle Gumede, uthi ulethemba lokuthi izasebenza imali yeZiG.
Abanye abahambe emkhosini lo ngokhokhela elinye icele leCitizens Coalition for Change uSikhwicamfundo Welshman Ncube, ophethe isikhundla sikanobhala jikelele kubandla leli uMnu. Sengezo Tshabangu, uSikhwicamfundo Lovemore Madhuku okubandla leNational Constitutional Assembly, uMnu. Charlton Hwende, uMnu. Clifford Hlatshwayo, uMnu. Richard Tsvangirai, uMnu. Happymore Chidziva labanye abaphikisayo. UTshabangu uthe kuqondile ukuthakazelela uzibuse.
Banengi abangathakazeleli uzibuse. UMnu. Gilbert Nduna obevela eSilobela obesemkhosini lo uthi kuyadanisa ukuba kuthakazelela uzibuse ilizwe libhekane lobunzima bomnotho.
Umkhokheli wabalwa impi yenkululeko, uMnu. Petros Sibanda, uthi akula okujabulisayo ngozibuse weZimbabwe.
Kubikwa ukuba kulabantu ababili abafe emkhosini lo kulandela ukuxokozela kwabantu. Kodwa isikhulumeli samapholisa uSenior Assistant Commissioner Paul Nyathi uthe kazi lutho ngodaba lolu. Umkhosi wanamuhla unanzwe phansi kwesihloko esithi: ‘Zim @44: Unity, Peace and Development towards Vision 2030’.
Banengi abathakazelela uzibuse kube labanye njalo abathi ukulasizatho sokuthakazelela uzibuse ngoba ilizwe kalilamali njalo asenciphe okumangalisayo amathuba okuziphilisa eZimbabwe ngenxa yokugugudeka kwedollar lelizwe.
Bathi uhulumende kaMongameli Emmerson Mnangagwa ubathwalise nzima njengoba bengavunyelwa ukuvota santando lokwenza konke okulakho ukuba kube lohulumende kazulu.
Ukuze sihlaziye udaba lolu, uGibbs Dube weStudio 7 uxoxe loMnu. Believe Gaule okubandla leZanu PF loMnu. Nhlanhla Moses Ncube okunhlanganiso yeFreedom Alliance. UGaule usungula lingxoxo.
Forum