UMongameli weleBotswana uMnu Ian Khama uthi uMongameli Robert Mugabe sokumele asuke esihlalweni ngoba esehlulekile ukubusa kuhle.
UKhama uthi sokudingeka ubukhokheli obutsha obulamaqhinga okuvusela eleZimbabwe, lona eselileminyana edlula elitshumi lanhlanu libhekane lobunzima bokubhidlika komnotho lokusilela kwemisebenzi.
Ekhuluma lephephandaba lebulenjini eleReuters, uMongameli Khama uthe kusobala ukuthi uMugabe seluphele njalo kaselawo amasu lamandla okuvuselela umnotho welizwe.
Ngalokho, uthe sokumele asuke embusweni adedele abanye ngoba eleZimbabwe lilabo abantu abangaba ngabakhokheli abaqotho alubana bethe bathola ithuba lokukhokhela ilizwe.
Wengeze wathi udaba lweZimbabwe luhlupha wonke amazwe asezansi kwezwekazi leAfrica ngoba izizalwane zalelilizwe sezigcwele emazweni wonke la okugoqela eleBotswana.
Ingcwethi kwezombusazwe njalo efundisa ekolishini leHuddersfield University kweleBhilithani uDr. Nkululeko Sibanda uthi ngempela uMugabe sokumele esuke embusweni.
