amalinks wokungena

Kukhululwa Abazali 'Ababefuna Ukuxotsha' Umphathisikolo Ongazi IsiNdebele


Abantwana besikolo.

Abazali abatshengisela besola umphathisikolo weMlamu Secondary School ukuthi kazi ukukhuluma ulimi lwabantwababo batholakale bengelacala emthethwandaba we Lupane ngoLwesine.

Umgcinisihlalo wenhlanganiso yabazali ephathisa isikolo, eye School Development Committee eMlamuli Secondary School, uMnu. Mbuso Nkomo, labazali abathathu abathi uMbonisi Khoza, uPeter Ndlovu loThabani Sibanda bafumanwe bengelacala lidale likamantshi uMnu. Ndumo Masuku eLupane.

Igqwetha leMathonsi Law Chambers, uMnu. Dumisani Moyo, nguye obemele izibotshwa ezine ezazibhekane lecala lokwephula umthetho weCriminal Codification and Reform Act.

Kade amapholisa ababophayo esithi batshela umphathisikolo weMlamuli Secondary School, uNkosikazi Millet Bonyongwe, ngoNhlangula ukuthi kumele asuke kulesosikolo njengalokho okwakufunwa ngabazali.

Idale libikelwe ukuba abazali bacela uNkosikazi Bonyongwe ukuba abaphe amakhiye ewofisi yakhe lendlu ahlala kiyo ngoba engenelisi ukusebenza eLupane alandele isinqumo esenziwa ngabazali.

UMPHATHISIKOLO UPHIKA ICALA

Igqwetha uDube utshele umsakazo weStudio 7 ukuba udaba lusuke lwaguquka izolo lapho umamangala uNkosikazi Bonyongwe ebike ukuba yena kazange ayemangala njalo icala okuthiwa walimangala kalazi ngoba abazali kabazange bamhlukuluze njalo babelandela isinqumo laye avumelana laso labadala besikolo.

UDube ubike ukuba abazali abafumanwe bengelacala bahle bakhululwa.

UDube ungezelele esithi umantshi ucunuke kakhulu ngesikhathi kuvela ukuba uNkosikazi Bonyongwe kazange amangale njalo wabizwa ngamapholisa esebanjwa ngamandla ukuba azosayina amaphepha enkulumo angayenzanga.

Umfakazi uZibusiso Masuku laye uvumelane loNkosikazi Bonyongwe ethi abazali abazange babelolaka babelandela isinqumo seSchool Development Committee, amapholisa kunye lezisebenzi zikahulkumende ezemfundo esenziwa ngoNhlolanja 23 lonyaka.

INGQONDO EMBI

ENkundleni kaMantshi kuvele ukuba amapholisa abeqhuba ingalo embi engekho emthethweni besethusela abazali besebenzelana loSergeant Darlington Hochi otshele idale ukuba yena usebenza lamapholisa labacuphi abamazisa ukuba abantu beSiNdebeleni sebexotshe umbalisi weSiShona eMlamuli Secondary School.

UMtshutshisi uNdlovu wamukele isicelo sika Dube sokulahla icala njengoba uBonyongwe ethe kazange amangale njalo kalamlandu labazali leSDC.

Ekhulula izibotshwa, uMantshi uMasuku uveze ukucunuka esithi abazali abalacala ngoba abukho ubufakazi obuveza ukuba balecala njalo ilungelo labazali lokukhululeka lephulwe.

Wengeze esithi ngamapholisa ayehluleka umsebenzi besehlisa inhlonipho yedale kunye lamapholisa njalo bechitha isikhathi sedale ngamacala abazibumbela wona.

UMongameli weMthwakazi Republic Party, uMnu. Mxolisi Moyo, ubike ukuba umantshi uphathe kahle inkundla yakhe njalo kwavela ukuba amapholisa ahlukumeza abazali emakhaya ebabumbela amacala angekho.

XS
SM
MD
LG