UMongameli Robert Mugabe ukhethe ukungahambi eBotswana ngoLwesihlanu emkhosini wokuthakazelela iminyaka engamatshumi amahlanu lelo lizwe lathola uzibusa ngemva kokunxuswa nguMongameli Ian Khama.
UKhama usanda kuchothoza uMugabe esithi kayehle esihlalweni ngoba esegugile njalo esebuse kakhulu.
UKhama kade enxuse uMugabe kanye leyinye inkokheli emhlubulweni wangezansi kwezwekazi leAfrica ukuthi ibe kumicimbicimbi yokunanza imnyaka engamatshumi amahlanu eleBotswana lizibusa.
Kodwa uMugabe, osanda kutshelwa ukuthi katshiye umbuso nguKhama, kazihluphanga ngokuya eBotswana. Uthumele uMnu. Simbarashe Mbengegwi okuhlangothi lukahulumende olukhangelane lezokudlelana lamanye amazwe.
Inengi belilinde ukuthi uMugabe azobhekana mathupha loKhama okukuqala lokhe umongameli weBotswana waphambana lenengi ngokutshela uMugabe ukuthi isikhathi sesitshayile.
UMnunzana Adens Banda uthe kade belinde ngamehlo abomvu ukubona ukuthi ukufuthelana phakathi kwabakhokheli bobabili kuzahamba njani ngesikhathi bengenela idili likazibuse eGaborone…
"Besikulindile ukubuya kwakhe kodwa ngemva kokuxabana loKhama kuyezwakala ukuthi yindaba engabuyanga."
Kodwa uthe bekumgceke ukuthi uMugabe angakhetha ukuhlala ekhaya ngemva kwenkulumo kaKhama ebonakala imyangisa. Uthi uMugabe ngumuntu othanda ukuhamba kulezinsuku ngakho ukungafiki kwakhe eGaborone kutshengisa ukuthi ucabange kanengi ngodaba lwakhona…
"UMugabe ngumuntu othanda ukuhamba kodwa khathesi kutsho amahloni amphethe ngemva kokuxabana loKhama.”
UMnumzana Carlton Tembo uthe bona njengezizalwane zeZimbabwe ezihlala eBotswana bayasekela amazwi kaKhama ukuthi uMugabe kayehlike esihlalweni, njalo akumela kuntshintshe lutho ethi iqiniso liyababa…
“UKhama wenze into enhle kakhulu, siyakucoma, uma ekukhuluma sekungathi yinto embi, khona vele iqiniso libuhlungu."
Amazwe amanengi athumele abameli ngaphandle kweSwaziland ebe imelwe yinkosi uMswati. Bekulabameli njalo abavela eBhilithani, lapho iBotswana eyathatha khona uzibuse ngo1966.
