amalinks wokungena

UMugabe Uthi Kasoze Asuse uMutambara Esikhundleni


Umkhokheli weMDC uMnu Welshman Ncube ube lomhlangano loMongameli Robert Mugabe ngoLwesibili bekhulumisana ngodaba lukaMnu Arthur Mutambara.

Emhlanganweni lo, uMugabe ugcizelele ukuthi kasoze amkhiphe uMutambara esikhundleni sokuba ngumsekeli wenhloko kahulumende.

Umanyano weSadc unqume ngeviki edluleyo ukuthi uNcube nguye omele abe kunkulumo zokulungisisa okuhluphayo kuhulumende njengomholi weMDC, hatshi uMutambara.

Kodwa uMugabe uthi kasoze asuse uMutambara esikhundleni lanxa engasela bandla alimelayo.

Emhlanganweni lo, uNcube uhambe lonobhala jikelele webandla lakhe uNkosikazi Priscillar Misihairambwi Mushonga.

Ababili laba banikeze uMugabe ingwalo ezilezinqumo zomthethwandaba weHigh Court ezisekela ukukhethwa kukaNcube njengomkhokheli weMDC.

Izinqumo lezi zithi njalo uMutambara akumelanga aqhubeke ezithi ungumkhokheli weMDC.

UNkosikazi Mushonga uthi bahambise izinqumo lezi kuMugabe ukuthi ayezibalela azizwisise ngoba ekhanya engayizwisisi indaba yobukhokheli beMDC, okuyinto evele sobala emhlanganweni weSadc eMaputo ngeviki edluleyo.

Umlamulankunzi kudaba lweZimbabwe, enguMongameli weSouth Africa uMnu Jacob Zuma nguye owaqala ukwala ukuhlangana loMutambara ekwethekeleleni kwakhe eHarare kumaviki amabili edluleyo.

Olwela ilungelo loluntu uMnu Zenzele Ndebele uthi isizatho sokuthi uTsvangirai loMugabe basekele uMutambara yikuthi uNcube liNdebele bona bangamaShona.

Inyathelo lakhe lasekelwa yiSadc. Into edanisa iMDC kaNcube, yikuthi uTsvangirai laye ukhaya esekela uMutambara njengoMugabe.

Kukhethwa uNcube emhlanganweni weCongress, uMutambara wayekhona laye wavuma ukuthi uNcube senguye umkhokheli webandla.

Kodwa into emangalise abanengi yikuthi uthe esuka khonapho wakhanya sengothi kabunanzi ubukhokheli bukaNcube.

XS
SM
MD
LG