Abebandla lamaDemocrats laseMelika basungule umhlangano wabo omkhulu oweDemocratic National Convention edolobheni le Philadelphia bezama ngazo zonke indlela ukukhuthaza ukumanyana besekela ozabamela kukhetho lokudinga umongameli weMelika uNkosikazi Hillary Clinton.
USenator weVermont uMnu. Bernie Sanders, obe ncintisana loNkosikazi Clinton kukhetho lwamaprimaries kudingwa ozamela amaDemocrats kukhetho lokudinga umongameli weMelika, uvumile ukuthi wanqotshwa.
Wakhuthaza abantu ukuthi basekele uClinton ethi leli lizwe lidinga umkhokheli omanyanisa abantu hatshi okhuluma kubi ngeminye imihlobo enjengamaLatinos, amaMoslems, abesifazana, abensundu lababekubutho.
Laloba bekusobala ukuthi ababemsekela bebelokhe belokhophe bethandabuza ukusekela uClinton yena uqine ngelokuthi kumele bamanyane bamkhethe ukuba ngumongameli weMelika ngaleyo ndlela bevimbe uDonald Trump ukukhokhela lelo lizwe.
“Kubasekeli bethu abalapha emhlanganweni laselizweni lonke, ngilethemba lokuthi liyaziqenya ngalokho esesikufezile. Simanyene bangani bami sisungule umsebenzi omkhulu wokunika eleMelika idlabuzane lentuthuko”.
Umkakhe kamongameli Barack Obama, oseqedisa ihlandla lakhe lesibili lokubusa engowebandla lamaDemocrats, uNkosikazi Michelle Obama ulethe idlabuzane emhlanganweni waleli bandla lapho ekhuluma ngempilo yakhe ese White House ekhuthaza abantu ukulotshwa kwembali ngokukhetha okwakuqala umongameli wesifazana njengokukhethwa kwakuqala komkakhe njengomongameli onsundu wakuqala weMelika.
"Nxa ngicabanga ngomkhokheli okumele akhokheli leli lizwe lethu elihle kangaka ongaba ngumkhokheli wabantwabami abangamankazana sifuna ukubona umongameli olembali yokusebenzela uzulu, ophila impilo ezaba yisifundo kubantwabethu, oqakathekisa umsebenzi wakhe owaziyo ukuthi ukuba ngumongameli ayisikho kudlala amandlwane”
Inkulumo yakhe laloba engabethanga uTrump ngebizo ubegudla iguma lapho esithi kufuneka umongameli ololwazi olweneleyo ngokudlelana kwabantu, okhetha amagama awatshoyo engaphongubhudluka ethuka abantu njalo olokuzinza.
"Lingayengwa ngabantu abatshona belitshela ukuthi leli lizwe seliwonakele, akulanto enjalo. Leli lilizwe lihlonitshwa ngabanengi emhlabeni jikelele njalo wonke umuntu ufuna ukuzohlala kilo”
Omunye okhulume waqakezelwa kakhulu, eletha laye idlabuzane kulumhlangano oweDNC nguSenator weNew Jersey uCory Booker, oke wanakanelwa unguba angaba ngumsekeli kaClinton engakakhethi uSenator Tim Kaine.
UBooker uchaze uTrump njengomuntu olenkulmo enjonge ukwehlukanisa uzulu weMelika hatshi ukumanyanisa, ethi leli lizwe lakhiwe ngothando ngakhoke olentshumayelo yothando nguClinton okumele akhethwe ukuba ngumongameli waleli lizwe.
Abakade bekhangelelwe ukukhuluma ngoLwesibili emhlanganweni owe Democratic National Convention bagoqela uDonna Brazile osaphethe isikhundla sokuba ngumgcinisihlalo, uNancy Pelosi okhokhela amalunga ebandla amaDemocrats edale lephalamende ele House of Representatives owaba ngumlawuli waleli dale wesifazana wakuqala, kuzoa lowake waba ngumongameli weMelika uBill Clinton ongumkakhe kaHillarry Clinton, abeqembu leMothers of the Movement elabomama abafelwa ngabantwana bedutshulwa kudlakela lokufuthelana phakathi kukazulu lamapholisa.
