amalinks wokungena

Inhlanganiso yeUN Inika iZimbabwe i$1,6 Million Yokusiza Abadilikelwa Yimizi


Owesifazana umunyisa umntwana eTsholotsho lapho okwaba lempopoma zamanzi ezakhukhula imizi eminengi.

Inhlanganiso yomanyano wamazwe womhlaba eye United Nations isiphe eleZimbabwe uncedo olwedlula isigidi lengxenye zamadola - $1,6 million – phansi kwesikhwama seCentral Emergency Relief Fund (CERF) esikhangelane labadilizelwa imizi yabo zimpopoma zamanzi lonyaka lanyakenye.

Iziqinti ezingamatshumi amabili zeZimbabwe zizathola uncedo lwamatende, amanzi lokunye okuhambelana lalokhu kusengezelela kuncedo olwaphiwa imuli ezazibhekane lendlala ngomnyaka odluleyo.

UMqondisi weUnited Nations kwele Zimbabwe, uMnu. Bishow Parajuli, uthe usizo lweCERF luza ngesikhathi esiqondileyo ngoba abahlaselwa zimpopoma zamanzi ezansi yeZimbabwe kunje lonke bethwele nzima.

Olwela amalungelo abesifazana, uNkosikazi Silethemba Mathe, uthi luhlelo oluhle olwenziwa yiUN njalo kuhle uma abesifazana benganakekelwa kabanzi ngoba usizo obelukhona bebenakwa ngezokudla kuphela hatshi okunjenge mvunulo lapho besesikhathini.

Osakhulayo, uNkosazana Samantha Ndlovu, uthi bayabonga usizo abalutholileyo njengabafundi ethi yinto enhle.

Uhlelo lokutholisa abantu usizo luzaqhutshwa yinhlanganiso yomhlaba iUNICEF, IOM, iUNFPA, inhlanganiso ezizimeleyo kunye lohulumende. Imuli ezedlula inkulungwane eyodwa zizatholiswa impahla ezehlukeneyo kuthi omama abazinkulungwane ezimbile lengxenye bazatholiswa impahla yokuvitsha ngesikhathi besesikhathini kunye lamaphilisi okwelamisa kuhle imuli

Kulandela ukubika kukamongameli ukuba impopoma zamanzi yingozi yelizwe kudingakala imali edlula izigidi phose zingamakhulu amabili zamadollar-$189 million ekusizeni abahlaselwa yilengozi.

Uhulumende weNamibia, iChina, iUK, iJapan le European Commission ngabanye babatholise uncedo kwabahlaselwa zimpopoma zamanzi. Kuthi inhlanganiso yeWorld Food Programme (WFP), iUNICEF seyathatha ukudla kwendlala yakusa kwabahlaselwa zimpopoma zamanzi.

Facebook Forum

XS
SM
MD
LG