Umngcele ophakathi kweZimbabwe leBotswana ovulwe ngenyanga edluleyo, oweNlambapeli, uqale ngenani labantu abawusebenzisayo eliphezulu lanxa nje umgwaqo oya kuwo usesimeni esibi.
Umngcele lo, ungezansi kweGwanda njalo abangene lokuphuma elizweni ngawo phakathi kwamaviki amathathu ngoNhlangula bayinkulungwane eyodwa lamakhulu amabili.
Amazwe womabili avule umngcele lo ngenhloso yokwehliswa inani lezihambi ezisebenzisa umngcele wePlumtree kanye leRamokgwebana Border Post.
Abanengi abahlala endaweni ezifana leKhezi leGwanda bathi kabasazihluphi ngokudlula ePlumtree nxa besiya eBotswana ngoba kukhatshana kakhulu.
Omunye wabo nguNkosikazi Priscilla Ndlovu ohlala esigabeni seBuvuma.
“Ukuvulwa kwalumngcele kusincedile, sengike ngawusebenzisa. Uyawuquma umango kulokutshona ubhoda usiya ePlumtree,” kutsho uNkosikazi Ndlovu.
Kodwa uthe ulokudana okukhulu ngokonakala komgqwaqo, ikakhulu kucele leZimbabwe. Amazwi akhe agcizelelwe nguMnu Alex Banda.
"Umgwaqo uqakathekile ekusebenzeni komngcele ngoba siyazi kulomunye eMatsiloje kodwa abantu abanengi abawusebenzisi ngenxa yomgwaqo omubi,” kutsho uBanda.
Izihambi ezingena lokuphuma kumazwe womabili emhlubulweni wePlumtree bezisebenzisa kakhulu umngcele wePlumtree wona oba yisiphithiphithi ikakhulu nxa kulekhefu.
