Ugatsha lwezempilakahle luthi umkhuhlane wemvukuzane yomlomo wesibeletho uhlasela abesifazana abedlula inkulungwane ezimbili ngomnyaka njalo phakathi kwabo, kufa abayinkulungwane eyodwa lamakhulu ayisikhombisa.
Lokhu kuvezwe yiziphathamandla zalolugatsha emhlanganweni eziwenze lekomidi yedale lephalamende ebona ngezempilakahla ngoMvulo.
Udokotela Maxwell Hove utshele likomodi ukuthi phakathi kwayo yonke imihlobo yemvukuzane ehlasela omama, eyesibeletho yiyo ehlasela abantu abanengi ngesilinganiso sokulitshumi lasitshiyagalombili ekhulwini, 18 percent.
Uveze njalo ukuthi kulabodokotela abahlanu kuphela eZimbabwe ababolwazi lwezinga laphezulu lokuthungatha lokwelapha umkhuhlane wemvukuzane.
Ababili basebenzela koBulawayo kuthi abathathu baseHarare. Abasebenzela koBulawayo laba yibo abakhangelane lezabelo zombili zeMatabeleland, okwenza umsebenzi wabo ubemnengi kakhulu.
Iziphathamandla zogatsha lwezempilakahle lezi ziveze njalo ukuthi imvukuzane yesibeletho isihlasela labesifazana abaleminyaka ephansi kwengamatshumi amathathu.
Udokotela Annette Moyo utshele iStudio 7 ukuthi okwenza umkhuhlane lo ubhahe kakhulu eZimbabwe yikuthi kulenani elinengi labantu ababulawa ngumkhuhlane wengcuaza.
Le yingcazelo egcizelelwa yinhlanganiso yeCancer Association of Zimbabwe.
Iqula lezempilakahlale leli likhuthaze amalunga edale lephalamende ukuthi akhulume ngemvukuzane yesibeletho emihlanganweni yawo lozulu emkhuthaze ukuthi ayehlolwa ngoba kulula ukuthi umkhuhlane lo welapheke ungabonakala usaqalisa.
Le yinkuthazo eyamukelwe lilunga ledale njalo engumsekeli wesikhulumeli seMDC-T uNkosazana Thabitha Khumalo.
UMakhumalo ukhuthaze uhulumende ukuthi aqakathekise odokotela ukuze kuqedwe ukusilela kwabo elizweni, ikakhulu abelapha umkhuhlane wemvukuzane.
Ugatsha lwezempilakahle emhlabeni jikelele olweWorld Health Organization luthi bayisigizi abesifazana abaphila lemvukuzane yomlomo wesibeletho njalo abanengi babo bahlala emazweni asathuthukayo kumbe alobuyanga.
