Intshantshu zanyakenye esigabeni seCastle Premier Soccer League iqembu le Chicken Inn litshayane lele Hwange umdlalo waze wafika emaphethelweni kungela qembu elenelise ukulitshayela emambuleni emdlalweni obusenkundleni ye Colliery ngoLwesithathu emini.
Limpumela itsho ukuba kuzakuba nzima ukuba iqembu le Chicken Inn livikele isicoco salo njengoba lizithola lihlezi kundawo yethoba minwe mbili lilemiklomelo elitshumi lane ngemva kwemidlalo elitshumi.
Iqembu le Chicken Inn litshiywe ngemiklomelo elitshumi lambili liqembu elihlezi phezu kwengalane ele Highlanders lona elihlangana lalo ngempelaviki ezayo.
Emidlalweni yesigaba se Southern Region Soccer League edlalwe namhla iqembu leAmagagasi yilo eselikhokhela phezu kwengalane yemiklomelo ngemva kokunqoba iqembu le Indlovu Iyanyathela nge 1 ka nya namhla emini emdlalweni obusenkundleni yeChinotimba ese Victoria Falls.
Iqembu le Amagagasi lilemiklomelo engamatshumi amabili lathoba munwe munye kuthi ngemva kwalo kuleqembu le Bantu Rovers elilemiklomelo engamatshumi amabili lesikhombisa.
Emdlalweni obusenkundleni yeWhite City koBulawayo iqembu le Bosso 90 libe ngutshiki lobhanqa leqembu 1 ka 1 leqembu le Bulawayo Chiefs.
Iqembu le Bulawayo Chiefs yilo eliqale ukuhlohla ngehlandla lakuqala elomdlalo njalo lihlohlelwe nguRemmington Masuku kwathi ele Bosso lilinganise ngehlandla lesibili elomdlalo njalo lihlohle umbekwa otshaywe ngu Thamsanqa Ncube.
Umeneja weqembu le Bulawayo Chiefs uFarai Sibanda uthi abafana bakhe bayilahle ngokungahlohli kanengi ngehlandla lakuqala elomdlalo lapho abakade bezibambe khona esidukwini.
Ngehlandla lakuqala lomdlalo sikhuthe amathuba amanengi kakhulu. Okunye okusiphazamisayo yikuba besilontshinthso olunengi kubadlali bethu ngoba kulabanye abakade belimele yikho ama combination akhona asuke ekhathaze.
Iqembu le Bulawayo Chiefs lilemiklomelo elitshumi lathoba munwe munye kodwa lona selidlale imidlalo eyithoba minwe mbili kuphela ngoba like laphiwa isikhathi esokuba abadlali balo baphole ngemva kokuvelelwa yingozi yemota besiyadlala eVictoria Falls.
