Umhlangano omkhulu webandla lamaDemocrats owokugcoba uNkosikazi Hillary Clinton ukuthi abe nguye ozamela lelibandla kukhetho lokudinga uMongameli weMelika ngoLwezi uqalisile ngoMvulo edolobheni lePhiladelphia.
Umkhokheli webandla leZimbabwe eliphikisayo elePeople’s Democratic Party (PDP) uMnu Tendai Biti ngomunye wabantu abanxusiweyo abasemhlanganweni lo.
Umhlangano lo uza kulokufuthelana kumaDemocrats phakathi kwabasekeli bakaClinton labakaMnu Bernie Sanders kulandela ubufakazi obukhomba ukuthi iziphathamandla zalelibandla zadlelezela ukuze uNkosikazi Clinton anqobe uMnu Sanders kukhetho lwamaPrimaries.
Lokhu kwenze umgcinisihlalo webandla uNkosazana Debbie Wasserman Schultz watshiya isikhundla.
Umhlangano lo uphela ngoLwesine njalo abakhangelelwe ukukhuluma ngoMvulo bagoqela uNkosikazi Michelle Obama.
Isizalwane seZimbabwe esihlala eMelika uMnu Den Moyo, yena osekela uNkosikazi Clinton uthi lanxa kulokufuthelana lokhu, ukhangelele ukuthi umhlangano lo uqhutshwe kuhle.
